អាមេរិក បាត់បង់ និងខូចខាតយន្តហោះចម្បាំង-ដ្រូន ជាង ៤០គ្រឿង ពេល​វាយ​អ៊ីរ៉ង់

របាយការណ៍ផ្លូវការមួយពីសហរដ្ឋអាមេរិក ដែល​ត្រូវ​បាន​ចុះផ្សាយ​ដោយសារព័ត៌មាន The Telegraph នា​ថ្ងៃទី​២០ ខែ​ឧសភា នេះ បានទម្លាយឱ្យដឹងថា នៅក្នុងប្រតិបត្តិការយោធាដ៏ក្តៅគគុកមួយ ឈ្មោះថា «Epic Fury» ដែលបើកការវាយប្រហារលើប្រទេសអ៊ីរ៉ង់ កាលពីចុងខែកុម្ភៈកន្លងទៅនេះ កងទ័ពអាកាសអាមេរិក បានរងការខូចខាត និងបាត់បង់យន្តហោះចម្បាំង ព្រមទាំងដ្រូនស៊ើបការណ៍ អស់យ៉ាងហោចណាស់ ៤២គ្រឿង។

យ៉ាង​ណាមិញ តួលេខ​នៃការបាត់បង់នេះ នៅមិនទាន់ជាតួលេខចុងក្រោយនៅឡើយទេ ព្រោះភ្នាក់ងារស្រាវជ្រាវនៃសភាអាមេរិក (CRS) បានបញ្ជាក់ថា ចំនួននេះ អាចនឹងមានការប្រែប្រួលទៅតាមការវាយតម្លៃជាក់ស្តែងបន្ថែមទៀត ដោយសារតែសកម្មភាពប្រយុទ្ធគ្នា នៅតែបន្តកើតមាន។

បើពិនិត្យទៅលើបញ្ជីឈ្មោះយន្តហោះដែលរងគ្រោះ គេឃើញមានយន្តហោះចម្បាំងទំនើបៗ និងដ្រូនមានតម្លៃថ្លៃៗ ជាច្រើនប្រភេទ។ ក្នុងនោះ រួមមាន យន្តហោះចម្បាំងប្រភេទ F-15E ចំនួន ៤គ្រឿង, យន្តហោះចម្បាំងជំនាន់ថ្មី F-35A មួយគ្រឿង, យន្តហោះវាយប្រហារគោលដៅ​លើដី A-10 មួយគ្រឿង, យន្តហោះចាក់សាំងលើអាកាស KC-135 ចំនួន ៧គ្រឿង, យន្តហោះរ៉ាដាបញ្ជាការ E-3 មួយគ្រឿង, រួមទាំងយន្តហោះដឹកជញ្ជូនសម្រាប់ប្រតិបត្តិការពិសេស និងឧទ្ធម្ភាគចក្រមួយចំនួនទៀត។ អ្វីដែលគួរឱ្យកត់សម្គាល់បំផុតនោះ គឺការបាត់បង់ដ្រូនស៊ើបការណ៍ធុនធ្ងន់ MQ-9 Reaper រហូតដល់ទៅ ២៤គ្រឿង និងដ្រូនប្រភេទ MQ-4C Triton មួយគ្រឿងទៀត ដែលធ្វើឱ្យទំហំនៃការខូចខាតផ្នែកបច្ចេកវិទ្យាអាកាសចរណ៍នេះ មានទំហំធំធេងមែនទែន។

តាមរយៈការប្រមូលទិន្នន័យពីសេចក្តីថ្លែងការណ៍របស់ក្រសួងការពារជាតិ និងបញ្ជាការដ្ឋានកណ្តាលរបស់អាមេរិក ភ្នាក់ងារ CRS បានបង្ហាញថា ជម្លោះមួយនេះ បានលេបត្របាក់ថវិការដ្ឋអស់យ៉ាងច្រើនសន្ធឹកសន្ធាប់។ នៅក្នុងសវនាការរបស់គណៈកម្មាធិការសភាសហរដ្ឋអាមេរិកកាលពីពេលថ្មីៗនេះ ប្រធានផ្នែកហិរញ្ញវត្ថុស្តីទីនៃមន្ទីរ​បញ្ចកោណ លោក Jules W Hurst III បានឡើងផ្តល់សក្ខីកម្មថា ការប៉ាន់ប្រមាណតម្លៃចំណាយលើប្រតិបត្តិការយោធានៅក្នុងប្រទេសអ៊ីរ៉ង់ បានហក់ឡើងខ្ពស់រហូតដល់ទៅ ២៩ ពាន់លានដុល្លារទៅហើយ។

លោកបានពន្យល់បន្ថែមថា មូលហេតុចម្បង ដែលនាំឱ្យទំហំទឹកប្រាក់ចំណាយ កើនឡើងយ៉ាងគំហុក​បែបនេះ គឺដោយសារតែរដ្ឋាភិបាលត្រូវចំណាយលើការគណនាឡើងវិញយ៉ាងលម្អិត ទៅលើតម្លៃនៃការជួសជុល និងការទិញជំនួសមកវិញនូវរាល់គ្រឿងយុទ្ធោបករណ៍ និងយន្តហោះចម្បាំងទាំងឡាយណា ដែលបានខូចខាត ឬត្រូវបានបំផ្លាញចោលនៅក្នុងសមរភូមិដ៏ស្រួចស្រាល់មួយនេះ៕

ប្រែសម្រួល៖ ឈាង