ព័ត៌មានអន្ដរជាតិ

អង់គ្លេស ចោទរុស្ស៊ី ថា ប្រើយន្តហោះចម្បាំងស្ទាក់ចាប់យន្តហោះឈ្លបការណ៍របស់អង់គ្លេស នៅសមុទ្ទខ្មៅ

បានផុស

២ ខែ មុន

នៅ

ថ្ងៃព្រហស្បតិ៍ ២១ ឧសភា ២០២៦

ដោយ

ក្រសួងការពារជាតិចក្រភពអង់គ្លេស បានឱ្យដឹងថា យន្តហោះចម្បាំងរុស្ស៊ីពីរគ្រឿងបានស្ទាក់ចាប់យន្តហោះឈ្លបយកការណ៍របស់កងទ័ពអាកាសអង់គ្លេស នៅលើសមុទ្រខ្មៅកាលពីខែមេសា ដែលបង្ហាញឲ្យឃើញនូវស្ថានភាពគ្រោះថ្នាក់។

យោងតាមសារព័ត៌មាន Al Jazeera ចុះផ្សាយថ្ងៃទី២០ ខែឧសភា ឆ្នាំ២០២៦ ក្នុងសេចក្តីថ្លែងការណ៍មួយចេញកាលថ្ងៃពុធទី២០ដដែល ក្រសួងការពារជាតិអង់គ្លេស បានអះអាងថា យន្តហោះ Rivet Joint របស់ខ្លួនមិនមានអាវុធទេ នឹងកំពុងអនុវត្តការឈ្លបយកការណ៍ជាប្រចាំក្នុងដែនអាកាសអន្តរជាតិលើសមុទ្រខ្មៅ ដោយគ្រាន់តែធានាសុវត្ថិភាពសម្រាប់សមាជិកណាតូនៅភាគខាងកើតអឺរ៉ុបប៉ុណ្ណោះ។

យ៉ាងណា ករណីនេះ មិនទាន់មានប្រតិកម្មភ្លាមៗពីរុស្ស៊ីទេ។

យន្តហោះចម្បាំងរុស្ស៊ី Su-35 ។ រូបភាព៖ Reuters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រដ្ឋមន្ត្រីក្រសួងការពារជាតិអង់គ្លេស លោក John Healey ថា ឧប្បត្តិហេតុនេះគឺជាឧទាហរណ៍មួយទៀតនៃអាកប្បកិរិយាដ៏គ្រោះថ្នាក់ និងមិនអាចទទួលយកបានរបស់អ្នកបើកយន្តហោះរុស្ស៊ី ឆ្ពោះទៅរកយន្តហោះគ្មានអាវុធដែលកំពុងប្រតិបត្តិការក្នុងដែនអាកាសអន្តរជាតិ។ លោកបន្ថែមថា៖ « សកម្មភាពទាំងនោះបង្កើតហានិភ័យធ្ងន់ធ្ងរ ដែលមានគ្រោះថ្នាក់ និងបង្កើនភាពតានតឹងដែលការកើនឡើងដែលអាចកើតមាន»។

មិនតែប៉ុណ្ណោះ យន្តហោះអង់គ្លេសត្រូវបានស្ទាក់ចាប់ម្តងហើយម្តងទៀត ដោយយន្តហោះចម្បាំង Su-៣៥ របស់រុស្ស៊ីហោះជិតបំផុត បង្កឱ្យប្រព័ន្ធសង្គ្រោះបន្ទាន់នៅលើយន្តហោះអង់គ្លេស។ នេះបើយោងតាមការចុះផ្សាយរបស់សារព័ត៌មាន BBC ។

រីឯយន្តហោះចម្បាំង Su-២៧ របស់រុស្ស៊ីមួយគ្រឿងបានហោះហើរចំនួន ៦ដង ចម្ងាយ៦ម៉ែត្រនៅខាងមុខរបស់យន្តហោះ Rivet Joint របស់អង់គ្លេស។

សេចក្តីថ្លែងការណ៍កាលថ្ងៃពុធបន្ថែមថា មន្ត្រីក្រសួងការពារជាតិនិងក្រសួងការបរទេសនៅសប្តាហ៍នេះក៏បានលើកឡើងជាផ្លូវការទៅកាន់ស្ថានទូតរុស្ស៊ីអំពីឧប្បត្តិហេតុផ្លូវអាកាសផងដែរ។ ឧប្បត្តិហេតុនោះគឺជាសកម្មភាពដ៏គ្រោះថ្នាក់បំផុតរបស់រុស្ស៊ីប្រឆាំងនឹងយន្តហោះឃ្លាំមើលរបស់ចក្រភពអង់គ្លេសចាប់តាំងពីឆ្នាំ២០២២ ពេលយន្តហោះរុស្ស៊ីនៅក្បែរនោះបាញ់មីស៊ីលមួយគ្រាប់លើសមុទ្រខ្មៅ ក្រោយមកទីក្រុងមូស្គូថាជាបញ្ហាបច្ចេកទេស។

ការស្ទាក់ចាប់ទាំងនោះកើតឡើងប៉ុន្មានថ្ងៃ បន្ទាប់ពី លោក Healey ប្រកាសថា កងទ័ពជើងទឹកអង់គ្លេសបានតាមដាននិងមើលឃើញនាវាមុជទឹករុស្ស៊ី ៣គ្រឿងកំពុងប្រតិបត្តិការសម្ងាត់ រយៈពេលមួយខែក្នុងដែនទឹកអាត្លង់ទិកភាគខាងជើងនៃចក្រភពអង់គ្លេស នៅជិតខ្សែកាបនិងបំពង់បង្ហូរប្រេងក្រោមសមុទ្រដ៏សំខាន់។

លោក Healey ព្រមានកាលពីថ្ងៃពុធថា៖ « សូមឱ្យខ្ញុំបញ្ជាក់ឱ្យច្បាស់ថា ឧប្បត្តិហេតុនេះនឹងមិនរារាំងការប្តេជ្ញាចិត្តរបស់ចក្រភពអង់គ្លេសក្នុងការការពារអង្គការណាតូ សម្ព័ន្ធមិត្ត និងផលប្រយោជន៍របស់យើងពីការឈ្លានពានរបស់រុស្ស៊ីនោះទេ»។

គួរបញ្ជាក់ថា សមុទ្រខ្មៅ គឺជាសមុទ្រស្ថិតនៅលើដីគោកដ៏ធំមួយ នៅជាយអាគ្នេយ៍នៃទ្វីបអឺរ៉ុប មានព្រំប្រទល់ជាប់នឹងប្រទេសចំនួន៦ គឺ អ៊ុយក្រែន រុស្ស៊ី ហ្សកហ្ស៊ី តួកគី ប៊ុលហ្គារី និងរូម៉ានី៕

សម្រួល៖ ណឺ មិនា