ក្រុមហេសបូឡា ទុកចិត្ត​លើ​​​អ៊ីរ៉ង់ ថា នឹង​មិនចុះ​កិច្ច​ព្រមព្រៀងទេ ដរាបណា អ៊ីស្រាអែល មិនដកទ័ពពីលីបង់

ក្រុម​សកម្មប្រយុទ្ធ​ហេសបូឡា​នៅ​លីបង់​ បានប្រកាសកាលពីថ្ងៃ ទី១៦ ខែមិថុនា ថា ខ្លួនជឿជាក់ថា អ៊ីរ៉ង់នឹងមិនចុះហត្ថលេខាលើកិច្ចព្រមព្រៀង​​​​ចុងក្រោយ ជាមួយទីក្រុងវ៉ាស៊ីនតោននោះទេ លុះត្រាតែអ៊ីស្រាអែលដកទ័ពចេញពីលីបង់ ខណៈដែលប្រមុខការទូតអ៊ីរ៉ង់បានលើកឡើងថា ការបន្តមានវត្តមានកងទ័ពអ៊ីស្រាអែល​នៅលីបង់ នឹងត្រូវចាត់ទុកថា ជាការរំលោភលើអនុស្សរណៈយោគយល់គ្នា (MoU) រវាងអាមេរិក និងអ៊ីរ៉ង់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទីភ្នាក់ងារសារព័ត៌មាន Reuters បាន​ស្រង់​ខ្លឹមសារ​ការិយាល័យប្រព័ន្ធផ្សព្វផ្សាយរបស់ក្រុមហេសបូឡា ដូច​​សរសេរ​ថា «យើងជឿជាក់ថា នឹងមិនមានកិច្ចព្រមព្រៀងនុយក្លេអ៊ែររវាងអ៊ីរ៉ង់ និងអាមេរិកនោះទេ បើអ៊ីស្រាអែលមិនដកទ័ពចេញ»។ នេះជាលើកទីមួយហើយដែលក្រុមប្រដាប់អាវុធមួយនេះ បានភ្ជាប់ការដក​ទ័ព​របស់អ៊ីស្រាអែល ទៅនឹងកិច្ចព្រមព្រៀង​ដែលអាចកើតមាន​ក្នុង​ពេលដ៏ខ្លីខាងមុខ​នេះ​​។

ប្រភពដដែល បានបន្តថា ការដកទ័ពរបស់អ៊ីស្រាអែល នឹងក្លាយជាលទ្ធផលដែលទទួលបានពីការចរចាទាំងនោះ មិនមែនជាលក្ខខណ្ឌតម្រូវជាមុនឡើយ។ ក្រុមហេសបូឡា ក៏បានបញ្ជាក់ផងដែរថា ខ្លួនទទួលបានការធានាពីភាគីអ៊ីរ៉ង់ថា រាល់ការរំលោភបំពានណាមួយរបស់អ៊ីស្រាអែលទៅលើបទឈប់បាញ់ក្នុងប្រទេសលីបង់ នឹងជះឥទ្ធិពលដល់ការចរចាដែលនឹងឈានចូលមកដល់ទាំងនោះ។

ដោយឡែក រដ្ឋមន្ត្រីការបរទេសអ៊ីរ៉ង់ លោក Abbas Araqchi បាននិយាយនៅក្នុងថ្ងៃដដែរ​នោះថា ការបញ្ចប់សង្គ្រាមក្នុងតំបន់ ត្រូវតែរួមបញ្ចូលទាំងការបញ្ចប់ជម្លោះនៅលីបង់ដែរ ដែលក្នុងនោះរួមមាន ការបញ្ចប់ការកាន់កាប់ លើទឹកដីលីបង់។ លោកបានសង្កត់ធ្ងន់ថា «បើគ្មានការដកកងកម្លាំងអ៊ីស្រាអែលចេញពីទឹកដីដែលពួកគេបានកាន់កាប់នៅក្នុងសង្គ្រាមនេះទេ ការបញ្ចប់សង្គ្រាមទាំងស្រុងគឺមិនទាន់អាចសម្រេចបានឡើយ»។

លោក Araqchi បានបន្ថែមទៀតថា រាល់ការវាយប្រហារណាមួយរបស់អ៊ីស្រាអែលមកលើលីបង់ ឬការបន្តកាន់កាប់ទឹកដីលីបង់ «តាមទស្សនៈរបស់យើង នឹងត្រូវចាត់ទុកថាជាការរំលោភលើអនុស្សរណៈយោគយល់គ្នា»៕

បច្ចុប្បន្ន កងទ័ពអ៊ីស្រាអែលនៅតែបន្តកាន់កាប់ទឹកដីមួយភាគធំនៅភាគខាងត្បូងលីបង់ ដែលពួកគេបានវាយដណ្តើមយកនៅក្នុងយុទ្ធនាការវាយប្រហារតាមអាកាស និងតាមជើងគោកដែលមានរយៈពេលបីខែប្រឆាំងនឹងក្រុមហេសបូឡា។ យុទ្ធនាការនេះបានចាប់ផ្តើមឡើង បន្ទាប់ពីក្រុមប្រដាប់អាវុធដែលគាំទ្រដោយអ៊ីរ៉ង់មួយនេះ បានបើកការវាយប្រហារដោយគ្រាប់រំសេវទៅលើអ៊ីស្រាអែលកាលពីថ្ងៃទី២ ខែមីនា ដើម្បីជាការគាំទ្រដល់ទីក្រុងតេហេរ៉ង់។

ការប្រយុទ្ធគ្នានៅលីបង់បានថយចុះកម្តៅយ៉ាងខ្លាំង បន្ទាប់ពីមានការព្រមព្រៀងលើអនុស្សរណៈយោគយល់គ្នារវាងអ៊ីរ៉ង់ និងអាមេរិក ប៉ុន្តែវាមិនទាន់បានបញ្ឈប់ទាំងស្រុងនោះទេ ហើយអ៊ីស្រាអែលបានបញ្ជាក់ថា កងទ័ពរបស់ខ្លួននឹងបន្តស្នាក់នៅភាគខាងត្បូងនៃប្រទេសនេះដដែល។

ទោះជាយ៉ាងណា ក្រុមហេសបូឡាបានសម្តែងការជំទាស់ចំពោះការបន្តកាន់កាប់របស់អ៊ីស្រាអែល។ កាលពីថ្ងៃអង្គារ ការិយាល័យប្រព័ន្ធផ្សព្វផ្សាយរបស់ក្រុមនេះបានប្រកាសថា ខ្លួនយល់ឃើញថា អ៊ីរ៉ង់នឹងទាមទារឲ្យមានការដកទ័ពអ៊ីស្រាអែលជាផ្នែកមួយនៃការចរចាជុំបន្ទាប់រវាងអាមេរិក និងអ៊ីរ៉ង់ ដែលនឹងត្រូវចាប់ផ្តើមឡើង បន្ទាប់ពីភាគីទាំងពីរចុះហត្ថលេខាជាផ្លូវការលើអនុស្សរណៈយោគយល់គ្នានៅថ្ងៃសុក្រខាងមុខនេះ។ ការចរចាទាំងនោះ ត្រូវបានរៀបចំឡើងដើម្បីដោះស្រាយបញ្ហាលំបាកៗជាច្រើន រួមទាំងអនាគតនៃកម្មវិធីនុយក្លេអ៊ែររបស់អ៊ីរ៉ង់ផងដែរ៕

អត្ថបទ ៖ សាង ស្រីល័ក្ខ

ប្រជាជន និងអ្នកនយោបាយអ៊ីស្រាអែល មិនពេញចិត្ត​​កាន់តែខ្លាំង​ ព្រោះ​តែ​ការ​​ចាញ់ប្រៀបក្នុង​កិច្ចព្រមព្រៀងអាមេរិក-អ៊ីរ៉ង់