ព័ត៌មានអន្ដរជាតិ

គួរបារម្ភ វៀតណាមរកឃើញវីរុសបំប្លែងខ្លួនឥណ្ឌា និងអង់គ្លេសចម្រុះគ្នា ឆ្លងកាន់តែលឿន

បានផុស

៥ years មុន

នៅ

ថ្ងៃសៅរ៍ ២៩ ឧសភា ២០២១

ដោយ

រដ្ឋមន្ត្រីក្រសួងសុខាភិបាលវៀតណាម លោក Nguyen Thanh Long បានឲ្យដឹងនៅថ្ងៃសៅរ៍ថា វៀតណាមបានរកឃើញវីរុសបំប្លែងខ្លួនកូនកាត់ថ្មីមួយដែលលាយចម្រុះគ្នារវាងវីរុសឥណ្ឌា និងចក្រភពអង់គ្លេសដែលបានសាយភាយយ៉ាងឆាប់រហ័សតាមរយៈខ្យល់ថែមទៀត។ នេះបើតាមកាសែត VnExpress បានចេញផ្សាយ។

បន្ទាប់ពីទប់ស្កាត់កូវីដ-១៩បានជោគជ័យកាលពីឆ្នាំមុន ពេលនេះវៀតណាមបានកំពុងទទួលរងការប្រហារពីកូវីដ-១៩ជាថ្មីដែលលើកនេះរាលដាលយ៉ាងឆាប់រហ័ស។

មនុស្សជិត៣៦០០នាក់ត្រូវបានរកឃើញឆ្លងនៅក្នុងទីក្រុង-ខេត្ត៣១ក្នុងចំណោមទីក្រុង-ខេត្តទាំង៦៣របស់វៀតណាម ចាប់តាំងពីចុងខែមេសា ដែលចំនួនឆ្លងនេះច្រើនជាងពាក់កណ្តាលនៃករណីឆ្លងសរុបរបស់ប្រទេស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Nguyen Thanh Long បាននិយាយថា ៖«បន្ទាប់ពីដំណើរការហ្សេនជាបន្តបន្ទាប់លើអ្នកជំងឺឆ្លងកូវីដ-១៩ថ្មី យើងបានរកឃើញករណីឆ្លងថ្មីមួយគឺចម្រុះគ្នារវាងវីរុសបំប្លែងខ្លួនឥណ្ឌា និងអង់គ្លេស»។

លោកថា ៖«កាន់តែជាក់ច្បាស់នោះគឺវីរុសបំប្លែងខ្លួនឥណ្ឌាប្រែប្រួលរូបរាងដើមចូលទៅវីរុសបំប្លែងខ្លួនអង់គ្លេស»។ លោកបញ្ជាក់ថា វៀតណាមនឹងប្រកាសពីវីរុសបំប្លែងខ្លួនបំរ៉ែបំរួលថ្មីទៅកាន់ពិភពលោកឆាប់ៗ។

កន្លងមក ប្រទេសវៀតណាមបានរកឃើញវីរុសបំប្លែងខ្លួន៧ប្រភេទគឺ B1222, B1619, D614G, B117 (មកពីចក្រភពអង់គ្លេស) និង B1351, A231, B16172 (មកពីប្រទេសឥណ្ឌា)។

លោក Nguyen Thanh Long ឲ្យដឹងថា វីរុសបំប្លែងខ្លួនថ្មីនេះមានឥទ្ធិពលក្នុងការឆ្លងខ្លាំង និងលឿនដែលត្រូវបានរកឃើញនៅកន្លែងផ្សេងៗគ្នាជាច្រើនក្នុងរយៈពេលខ្លី។

ដល់ពេលនេះ វៀតណាមមានករណីឆ្លងកូវីដ-១៩សរុប ៦៣៩៦នាក់ និងករណីស្លាប់៤៧នាក់៕

ប្រែសម្រួល៖ វីរបុត្រ
ប្រភព៖ CNA