ព័ត៌មានអន្ដរជាតិ

កូរ៉េខាងជើងអាចផ្ទុះកូវីដអាក្រក់ប៉ះពាល់ដល់ប្រទេសជាតិធ្ងន់ធ្ងរ

បានផុស

៥ years មុន

នៅ

ថ្ងៃពុធ ៣០ មិថុនា ២០២១

ដោយ

មេដឹកនាំកូរ៉េខាងជើង លោក គីម ជុងអ៊ុន បាននិយាយថា បរាជ័យក្នុងការទប់ស្កាត់កូវីដ-១៩បានបណ្តាលឲ្យកើតមាន«វិបត្តិដ៏ធ្ងន់ធ្ងរ»ប៉ះពាល់សុវត្ថិភាពប្រទេសជាតិ និងប្រជាជន។

នៅក្នុងការផ្សាយរបស់ទីភ្នាក់ងារសារព័ត៌មានរដ្ឋ KCNA នៅថ្ងៃពុធដែលមិនបានបញ្ជាក់លំអិតពីអ្វីដែលបានកើតឡើងថា មេដឹកនាំរូបនេះបានរិះគន់មន្ត្រីគណបក្សកាន់អំណាចរបស់លោកដែលមានការធ្វេសប្រហែសពីតួនាទីរបស់ខ្លួន។

លោក គីម ត្រូវបានគេចាប់អារម្មណ៍នៅពេលបង្ហាញខ្លួនក្នុងកិច្ចប្រជុំនយោបាយនៃគណបក្សពលករកំពុងកាន់អំណាចកាលពីថ្ងៃអង្គារ៍។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមទីភ្នាក់ងារសារព័ត៌មានកូរ៉េខាងត្បូង Yonhap បានលើកឡើងថា KCNA បានផ្សាយថា ៖«ដោយធ្វេសប្រហែសលើការសម្រេចចិត្តដ៏សំខាន់របស់គណបក្សក្នុងការប្រយុទ្ធប្រឆាំងមេរោគឆ្លងដែលជាភាពអាសន្នប្រទេសជាតិក្នុងការត្រៀមខ្លួនសម្រាប់វិបត្តិសុខភាពសកល មន្ត្រីដែលទទួលបន្ទុកបង្កឲ្យមានឧបទ្ទវហេតុអាក្រក់ដែលនាំឲ្យកើតមានវិបត្តិដ៏ធំចំពោះសុវត្ថិភាពប្រទេសជាតិ និងប្រជាជន»។

ប្រទេសកូរ៉េខាងជើងបានដាក់វិធានការទប់ស្កាត់យ៉ាងតឹងតែងនៅតាមព្រំដែន និងមិនមានសេចក្តីរាយការណ៍ណាមួយពីករណីឆ្លងកូវីដ-១៩ឡើយ ប៉ុន្តែមន្ត្រីកូរ៉េខាងត្បូង និងអាមេរិកបានបង្ហាញការសង្ស័យពាក់ព័ន្ធនឹងករណីនេះ។

ប្រទេសនេះកំពុងប្រឈមនឹងវិបត្តិសេដ្ឋកិច្ចធ្ងន់ធ្ងរមួយនៅក្នុងប្រវត្តិសាស្ត្រ៧៣ឆ្នាំរបស់ខ្លួនចំពេលដែលកង្វះអាហារ និងឱសថ ហើយបានព្រមានពីភាពអត់ការងារធ្វើ និងអត់ផ្ទះសម្បែងកំពុងកើនឡើង។

សេដ្ឋកិច្ចរបស់កូរ៉េខាងជើងត្រូវបានបំផ្លិចបំផ្លាញដោយការរឹតបន្តឹងព្រំដែនជាងមួយឆ្នាំមកហើយដោយភ័យខ្លាចកូវីដ-១៩ គ្រោះមហន្តរាយទឹកជំនន់ និងទណ្ឌកម្មសេដ្ឋកិច្ចអន្តរជាតិដែលត្រូវបានដាក់ដោយសារកម្មវិធីអាវុធមីស៊ីល និងនុយក្លេអ៊ែររបស់ខ្លួន៕

ប្រែសម្រួល៖ វីរបុត្រ
ប្រភព៖ theguardian