ព័ត៌មានអន្ដរជាតិ

នៅអាមេរិក ការគាំទ្រកូនឲ្យចាក់វ៉ាក់សាំង គឺជាអាវក្រោះសុវត្ថិភាព ការពារក្មេងៗ ពេលទៅសាលារៀន

បានផុស

៥ years មុន

នៅ

ថ្ងៃអង្គារ ២៤ សីហា ២០២១

ដោយ

នៅពេលឆ្នាំសិក្សាចាប់ផ្តើមនៅទូទាំងសហរដ្ឋអាមេរិក ចំពេលមានការកើនឡើងនៃករណីឆ្លងកូវីដដែលបង្កឡើងដោយវីរុសបំប្លែងខ្លួន Delta ។ ការស្ទង់មតិថ្មីមួយបង្ហាញថា ឪពុកម្តាយភាគច្រើនគាំទ្រវ៉ាក់សាំងសម្រាប់សិស្សនិងបុគ្គលិក ដើម្បីជាការធានាដល់សុវត្ថិភាពក្មេងក្នុងសាលារៀន និងជាអាវក្រោះការពារពួកគេ។

យោងតាមការស្ទង់មតិថ្នាក់ជាតិ ស្ដីពីសុខភាពកុមាររបស់សាកលវិទ្យាល័យ Michigan បញ្ជាក់ថា ៦២ ភាគរយនៃឪពុកម្ដាយជិត ១៧០០ នាក់ ដែលមានកូនយ៉ាងតិចម្នាក់អាយុពី ៧ ទៅ ១៨ ឆ្នាំបាននិយាយថា ពួកគេនឹងមានអារម្មណ៍ថាមានសុវត្ថិភាព ប្រសិនបើមនុស្សក្នុងសាលារៀនមានអត្រាចាក់វ៉ាក់សាំងខ្ពស់ជាងនេះ។

ឪពុកម្តាយ ៣ នាក់ក្នុងចំណោម ៥ នាក់នៃសិស្សនៅវិទ្យាល័យក៏បាននិយាយថា កូនរបស់ពួកគេនឹងមានអារម្មណ៍សុវត្ថិភាព ប្រសិនបើសិស្សនិងគ្រូភាគច្រើនត្រូវបានចាក់វ៉ាក់សាំង ហើយពួកគេចង់ដឹងថាតើមានមនុស្សប៉ុន្មាននាក់ដែលមិនបានចាក់វ៉ាក់សាំងកូវីដ។

ទោះយ៉ាងណាក៏ដោយមានតែឪពុកម្ដាយ ១ ក្នុងចំណោម ៥ នាក់ នៅក្នុងការស្ទង់មតិទូទាំងប្រទេសបាននិយាយថា ព័ត៌មានអំពីការចាក់វ៉ាក់សាំង នឹងប៉ះពាល់ដល់ការសម្រេចចិត្តរបស់ពួកគេ អំពីការបញ្ជូនកូនរបស់ពួកគេទៅសាលារៀន។

លោកស្រី Sarah Clark សហអ្នកស្ទង់មតិបាននិយាយនៅក្នុងសេចក្ដីប្រកាសព័ត៌មានរបស់សាកលវិទ្យាល័យមួយថា” គ្រួសារជាច្រើននឹងមានសុវត្ថិភាពជាងមុន ដោយដឹងថាសាលារបស់ពួកគេមានអត្រាចាក់វ៉ាក់សាំងខ្ពស់ ។ ប៉ុន្តែអ្នកខ្លះអាចមានអារម្មណ៍ថា ផលប៉ះពាល់អវិជ្ជមានដែលអាចកើតមាននៃការមិនចូលរៀនដោយផ្ទាល់ មានហានិភ័យខ្ពស់ជាងបុគ្គលដែលមិនបានចាក់វ៉ាក់សាំង”។

លោកស្រីបន្ថែមថា កូវីដ ១៩ បានធ្វើឲ្យអន្តរាយដល់បទពិសោធន៍សាលារបស់គ្រួសារជាច្រើនកាលពីឆ្នាំមុន ដោយឪពុកម្ដាយនិងក្មេងកំពុងដឹកនាំការផ្លាស់ប្ដូរ ដែលមិនអាចទាយទុកជាមុនបាន នៅក្នុងបរិយាកាសសិក្សា និងបញ្ហាសង្គមអារម្មណ៍និងការសិក្សាថ្មី៕

ប្រែសម្រួល៖ សាង ស្រីល័ក្ខ

ប្រភព៖UPI

ចុចអាន៖កិច្ចខិតខំប្រឹងប្រែងចាក់វ៉ាក់សាំងកូវីដ បានជួយសង្គ្រោះជីវិតមនុស្សជាង ១៤០,០០០ នាក់នៅអាមេរិក
ចុចអាន៖អាមេរិក ចេញចំណាត់ការរកភស្តុតាងចាក់វ៉ាក់សាំង អ្នកល្មើសច្បាប់នឹងរងពិន័យធ្ងន់ធ្ងរ