ថៃ បញ្ចេញលទ្ធផល ការចាក់វ៉ាក់សាំង Sinovac លាយ AstraZeneca

មន្រ្តីសុខាភិបាលជាន់ខ្ពស់ថៃ បាននិយាយកាលពីថ្ងៃព្រហស្បតិ៍ថា ការចាក់វ៉ាក់សាំងការពារជំងឺកូវីដ-១៩ ប្រភេទ Sinovac របស់ប្រទេសចិន បន្ទាប់មកចាក់ AstraZeneca របស់ចក្រភពអង់គ្លេស កំពុងបង្ហាញពីសុវត្ថិភាពនិងបង្កើនភាពស៊ាំដោយជោគជ័យ ក្នុងចំណោមអ្នកចាក់ ១.៥ លាននាក់ដំបូង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីខែកក្កដា ថៃបានក្លាយជាប្រទេសដំបូងគេលើពិភពលោក ដែលលាយវ៉ាក់សាំងចិននិងវ៉ាក់សាំងដែលបង្កើតដោយលោកខាងលិច នៅពេលករណីឆ្លងនិងស្លាប់បានកើនឡើង ហើយរដ្ឋាភិបាលបានតស៊ូជាមួយការផ្គត់ផ្គង់វ៉ាក់សាំង។

អនុលេខាធិការអចិន្ត្រៃយ៍លោក Supakit Sirilak បានប្រាប់សន្និសីទសារព័ត៌មានមួយកាលពីថ្ងៃព្រហស្បតិ៍ថា “រូបមន្តលាយនេះ ត្រូវបានចាក់ឲ្យមនុស្សជាង ១.៥ លាននាក់ ហើយវាមានសុវត្ថិភាព។ ប្រទេសថៃនឹងមិនចាក់វ៉ាក់សាំង Sinovac ពីរដូសទៀតទេ”។

មានតែ ១៣ភាគរយប៉ុណ្ណោះ ក្នុងចំណោមប្រជាជនជាង ៦៦ លាននាក់ ដែលបានទទួលថ្នាំបង្ការពេញលេញ។ ភាគច្រើននៃការឆ្លងចំនួន ១.២ លានករណីនិងការស្លាប់ ១២,១០៣ នាក់ បានកើតឡើងក្រោយខែមេសាឆ្នាំនេះ ដោយសារវីរុសបំប្លែងខ្លួន Delta និង Alpha។

ក្រសួងសុខាភិបាលនិយាយថា ការលាយបញ្ចូលគ្នារវាង Sinovac និង AstraZeneca បានជំរុញភាពស៊ាំដល់កម្រិតដូចការចាក់វ៉ាក់សាំង AstraZeneca ពីរដូសដែរ ហើយមានន័យថា យុទ្ធនាការចាក់វ៉ាក់សាំងអាចត្រូវបានបញ្ចប់ លឿនជាងមុនដោយសារគម្លាតដូសកាន់តែខ្លី៕

ប្រែសម្រួល៖ Vann Vann

ប្រភព៖ Bangkok Post

ចុចអាន៖ វ៉ាក់សាំង Sinovac ដូសទី៣ បង្កើនកម្រិតអង់ទីគ័រ ខ្លាំងក្លា