ព័ត៌មានអន្ដរជាតិ

បុរសវៀតណាមម្នាក់ជាប់គុក៥ឆ្នាំពីបទចម្លងកូវីដទៅអ្នកដទៃ

បានផុស

៥ years មុន

នៅ

ថ្ងៃអង្គារ ៧ កញ្ញា ២០២១

ដោយ

តុលាការវៀតណាមមួយបានកាត់ទោសបុរសម្នាក់ឲ្យជាប់ពន្ធនាគាររយៈពេល៥ឆ្នាំពីបទបំពានវិធានការចត្តាឡីស័ក និងចម្លងវីរុសកូវីដទៅអ្នកដទៃ។

បុរសឈ្មោះ Le Van Tri អាយុ២៨ឆ្នាំត្រូវបានកាត់ទោសពីបទចម្លងជំងឺដ៏គ្រោះថ្នាក់នៅក្នុងសវនាការមួយថ្ងៃកាលពីថ្ងៃចន្ទរបស់តុលាការខេត្ត Ca Mau។ នេះបើតាមការផ្សាយរបស់ទីភ្នាក់ងារសារព័ត៌មានរដ្ឋ Vietnam News Agency។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

វៀតណាមជាប្រទេសមួយដែលគ្រប់គ្រងកូវីដ-១៩បានល្អកាលពីដំបូង ប៉ុន្តែចាប់ពីចុងខែមេសា ឆ្នាំ២០២១នេះមក ការផ្ទុះសារថ្មីបានធ្វើឲ្យធ្ងន់ធ្ងរបំផុតរហូតជាប់កំណត់ត្រា។

សារព័ត៌មានរដ្ឋបានផ្សាយថា ៖«Tri បានវិលត្រឡប់ទៅខេត្ត Ca Mau មកពីទីក្រុងហូជីមិញ និងបានបំពានវិធានការចត្តាឡីស័យ២១ថ្ងៃ។ គាត់បានចម្លងមេរោគកូវីដដល់មនុស្ស៨នាក់ ក្នុងនោះមានម្នាក់បានស្លាប់ បន្ទាប់ពីព្យាបានបានមួយខែ»។

ខេត្ត Ca Mau ភាគខាងត្បូងប្រទេសវៀតណាមរហូតបដល់ពេលនេះមានករណីឆ្លងកូវីដ-១៩តែ១៩១នាក់ និងស្លាប់ពីរនាក់ប៉ុណ្ណោះចាប់តាំងពីកើតមានកូវីដមក ដែលជាចំនួនទាបបំផុតប្រៀបធៀបនឹងទីក្រុងហូជីមិញដែលមានករណីឆ្លងជិត ២៦០០០០នាក់ និងស្លាប់១០៦៨៥នាក់ដែលបានក្លាយជាមណ្ឌលឆ្លងធ្ងន់ធ្ងរបំផុតក្នុងប្រទេស។

វៀតណាមមានករណីឆ្លងកូវីដសរុប ៥៣៦០០០នាក់ និងស្លាប់១៣៣៨៥នាក់ដែលភាគច្រើនបំផុតកើតមានតែពីរបីខែចុងក្រោយនេះ។

ក្រៅពីបុរសខាងលើជាប់ពន្ធនាគារ៥ឆ្នាំ វៀតណាមក៏បានកាត់ទោសមនុស្សពីរនាក់ទៀតដែលម្នាក់ជាប់ពន្ធនាគារ១៨ខែ និងម្នាក់ទៀតជាប់ពន្ធនាគារ២ឆ្នាំពាក់ព័ន្ធនឹងបទចោទប្រកាន់ដូចគ្នា៕

ប្រែសម្រួល៖ វីរបុត្រ
ប្រភព៖ VNA