តុលាការឥណ្ឌា បញ្ជាឲ្យបុរសម្នាក់ បោកអ៊ុតខោអាវស្រី ២ពាន់នាក់ រយៈពេល កន្លះឆ្នាំ ករណីប៉ុនប៉ងរំលោភ

បុរសម្នាក់ដែលរងការចោទប្រកាន់ពីបទប៉ុនប៉ងរំលោភសេពសន្ថវៈ ត្រូវបានបង្គាប់ឲ្យបោកគក់និងអ៊ុតខោអាវស្ត្រីចំនួន ២,០០០ នាក់នៅក្នុងភូមិរបស់គាត់ រយៈពេល ៦ ខែ ជាលក្ខខណ្ឌនៅក្រៅឃុំ។

លោក Lalan Kumar អាយុ២០ឆ្នាំ ត្រូវតែទិញសាប៊ូបោកខោអាវនិងរបស់របរត្រូវការផ្សេងទៀតដោយខ្លួនឯង ដើម្បីបោកអ៊ុតដោយឥតគិតថ្លៃរយៈពេល ៦ ខែដល់ស្ត្រីជនជាតិ Majhor នៅក្នុងរដ្ឋ Bihar តាមសេចក្តីសម្រេចកាលពីថ្ងៃពុធ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មន្រ្តីប៉ូលិសប្រចាំស្រុក Madhubani នៃរដ្ឋ Bihar បានប្រាប់ទីភ្នាក់ងារសារព័ត៌មាន AFP ថា លោក Kumar ត្រូវបានចាប់ខ្លួនកាលពីខែមេសា ដោយចោទប្រកាន់ពីបទប៉ុនប៉ងរំលោភសេពសន្ថវៈ។

គាត់ក៏ត្រូវតម្រូវឲ្យបង់ប្រាក់ធានាផងដែរ ហើយគ្មានកាលបរិច្ឆេទត្រូវបានកំណត់សម្រាប់ការជំនុំជម្រះក្តីរបស់គាត់ទេ។

លោកស្រី Nasima Khatoon ប្រធានក្រុមប្រឹក្សាភូមិបានអះអាងថា ស្ត្រីទាំងអស់នៅក្នុងភូមិពិតជាពេញចិត្តចំពោះ សេចក្តីសម្រេចរបស់តុលាការ។

ស្ត្រីនៅក្នុងភូមិបាននិយាយថា បទបញ្ជានេះបានជះឥទ្ធិពលវិជ្ជមានរួចទៅហើយ ដោយធ្វើឲ្យឧក្រិដ្ឋកម្មប្រឆាំងនឹងស្ត្រី ក្លាយជាប្រធានបទនៃការពិភាក្សានៅក្នុងសហគមន៍របស់ពួកគេ។

គួរបញ្ជាក់ថា ច្បាប់រំលោភសេពសន្ថវៈរបស់ឥណ្ឌា ត្រូវបានរៀបចំឡើងវិញបន្ទាប់ពីហេតុការណ៍ឆ្នាំ ២០១២ នៅទីក្រុងញូវដែលី ប៉ុន្តែចំនួនបទល្មើសនៅតែខ្ពស់ដដែល ដោយមានករណីរំលោភជាង ២៨,០០០ ករណីត្រូវបានរាយការណ៍ក្នុងឆ្នាំ ២០២០។

ទោះបីជាយ៉ាងណាក៏ដោយ ចំនួនពិតប្រាកដ ទំនងជាខ្ពស់ជាងនេះ ឆ្ងាយណាស់៕

ប្រែសម្រួល៖ Vann Vann

ប្រភព៖ Daily Mail

ចុចអាន៖ ករណីកក្រើកប្រទេសឥណ្ឌាជាថ្មី! ក្មេងស្រីអាយុ ១៥ឆ្នាំ ត្រូវបុរស ៣៣នាក់ចាប់រំលោភ