តាលីបង់ ហាមយុទ្ធជនរបស់ខ្លួនមិនឲ្យកាន់ទូរស័ព្ទសូម្បីថត Selfie

រដ្ឋមន្ត្រីការពារជាតិតាលីបង់លោក Mullah Mohammad Yakoob បានធ្វើការស្តីបន្ទោសនៅក្នុងសារជាសំឡេងជុំវិញការប្រព្រឹត្តមិនត្រឹមត្រូវរបស់យុទ្ធជនរបស់ខ្លួនមួយចំនួន បន្ទាប់ពីអាមេរិកដកទ័ពចេញពីអាហ្វហ្គានីស្ថាន ។

លោក Yakoob បាននិយាយនៅក្នុងសារមួយសក្នុងនាមជាមេបញ្ជាការតាលីបង់ថា “យើងណែនាំអ្នកកុំឲ្យកាន់ទូរស័ព្ទដៃថត Selfie បើមិនដូច្នេះទេនឹងចាត់វិធានការតឹងរ៉ឹងចំពោះអ្នក ។ យើងមិនចង់បានមនុស្សបែបនេះនៅក្នុងជួររដ្ឋាភិបាលរបស់យើងទេ ព្រោះវាអាចជាការសងសឹក” ។

សារសំឡេងនៅលើ Twitterដែលគ្រប់គ្រងដោយតាលីបង់ ត្រូវបានចែករំលែកយ៉ាងទូលំទូលាយនៅលើបណ្តាញសង្គមជាច្រើន ។ ទោះយ៉ាងណាក៏ដោយ វានៅតែមិនច្បាស់ថាតើឧប្បត្តិហេតុពិតប្រាកដដែលលោក Yakoob សំដៅទៅលើអ្វី ។ មានសេចក្តីរាយការណ៍អំពីការឈ្លោះប្រកែកគ្នារវាងបក្សពួកតាលីបង់ ដោយសារពួកគេខ្លះចង់ជ្រើសរើសវិធីសាស្រ្តកម្រិតមធ្យម ខណៈដែលអ្នកផ្សេងទៀតមិនចង់សម្របសម្រួលអ្វីទាំងអស់ ។

លោក Yakoob ក៏បានកត់សម្គាល់ផងដែរពីយុទ្ធជនតាលីបង់មួយចំនួន ដែលបានយកទូរស័ព្ទចូលក្នុងការិយាល័យរដ្ឋាភិបាល និងថតរូប Selfie ។

លោកបាននិយាយថា “នេះគឺជាការជំទាស់យ៉ាងខ្លាំង ព្រោះមនុស្សគ្រប់គ្នាកំពុងត្រូវបានដកហូតទូរស័ព្ទដៃ ពេលចូលទៅក្នុងក្រសួងសំខាន់ៗ ។ ការថតរូប និងវីដេអូបែបនេះនឹងមិនជួយអ្នកក្នុងពិភពលោកនាពេលបច្ចុប្បន្ន និងនៅថ្ងៃអនាគតនោះទេ” ៕

ប្រែសម្រួលដោយ ៖ ជីវ័ន្ត

ប្រភព ៖ Hindustan Times

ចុចអាន ៖ តាលីបង់ បន្តអនុវត្តទណ្ឌកម្មឃោរឃៅ កាត់ដៃជើងចោរលួច ឬប្លន់ ប្រហារជីវិតអ្នកប្រព្រឹត្តឃាតកម្ម