ក្រុមគ្រឿងញៀន អុកឡុកក្នុងពន្ធនាគារ អេក្វាទ័រ ស្លាប់មនុស្សជាង ១០០នាក់

មនុស្សជាង ១០០ នាក់ឥឡូវនេះ ត្រូវបានគេដឹងថា ស្លាប់ក្នុងការប្រយុទ្ធគ្នារវាងក្រុមអន្ធពាលជាគូប្រជែង នៅពន្ធនាគារប្រទេសអេក្វាទ័រ ដែលបានធ្វើឲ្យវាក្លាយជាអំពើហិង្សាក្នុងពន្ធនាគារអាក្រក់បំផុត នៅក្នុងប្រវត្តិសាស្ត្ររបស់ប្រទេសនេះ។

អ្នកទោសយ៉ាងតិច ៥ នាក់ត្រូវបានកាត់ក្បាល ក្នុងការប្រយុទ្ធកាលពីថ្ងៃអង្គារនៅទីក្រុង Guayaquil ខណៈអ្នកផ្សេងទៀតត្រូវបានបាញ់សម្លាប់។

មេបញ្ជាការប៉ូលិស លោក Fausto Buenaño និយាយថា អ្នកទោសក៏បានគប់គ្រាប់បែកផងដែរ។

ហេតុការណ៍នេះ បានប្រើប្រាស់មន្ត្រីប៉ូលិសរហូតដល់ទៅ ៤០០ នាក់ ដើម្បីគ្រប់គ្រងពន្ធនាគារឡើងវិញ។ វាជាពន្ធនាគារ ដាក់អ្នកទោសដែលជាប់ពាក់ព័ន្ធនឹងក្រុមឧក្រិដ្ឋជនគ្រឿងញៀនទូទាំងពិភពលោក។

ប្រព័ន្ធផ្សព្វផ្សាយក្នុងស្រុករាយការណ៍ថា ការបះបោរនេះ ត្រូវបានបញ្ជាដោយក្រុមជួញដូរគ្រឿងញៀនម៉ិកស៊ិកដ៏មានឥទ្ធិពល ដែលបច្ចុប្បន្នកំពុងប្រតិបត្តិការនៅក្នុងប្រទេស អេក្វាទ័រ។

នាយកសេវាកម្មពន្ធនាគាររបស់អេក្វាទ័រ លោក Bolivar Garzon បានប្រាប់វិទ្យុក្នុងស្រុកថា ស្ថានភាពគឺគួរឲ្យភ័យខ្លាចខ្លាំងណាស់។

គួរបញ្ជាក់ថា វាគឺជាហេតុការណ៍ចុងក្រោយបង្អស់នៅក្នុងឧបទ្ទវហេតុដ៏សាហាវ ពាក់ព័ន្ធនឹងសមាជិកក្រុមអន្ធពាលដែល ប្រយុទ្ធដើម្បីគ្រប់គ្រងពន្ធនាគារ។

កាលពីខែកុម្ភៈ អ្នកទោសចំនួន៧៩នាក់ ត្រូវបានសម្លាប់ក្នុងការប្រយុទ្ធគ្នាស្រដៀងគ្នានេះ៕

ប្រែសម្រួល៖ Vann Vann

ប្រភព៖ BBC

ចុចអាន៖ ហែកគុកនៅ ហ្វីលីពីន ប៉ូលិសបាញ់សម្លាប់អ្នកទោសច្រើននាក់