អេក្វាទ័រប្រកាសដាក់ប្រទេសក្នុងគ្រាអាសន្ន៦០ថ្ងៃដើម្បីប្រយុទ្ធនឹងភ្លើងឆេះព្រៃ

រដ្ឋាភិបាល​អេក្វាទ័រ បានប្រកាសដាក់​ប្រទេស​មួយ​នេះ​​ក្នុងគ្រា​មាន​អាសន្នរយៈពេល​៦០ថ្ងៃ ខណៈដែលប្រទេសនៅអាមេរិកខាងត្បូងមួយ​នេះ បានរងការវាយប្រហារដោយគ្រោះរាំងស្ងួតធ្ងន់ធ្ងរ និងភ្លើងឆេះព្រៃ ដែលបានលេបត្របាក់ទឹកដីដ៏​ធំសម្បើមក្នុងរយៈពេលប៉ុន្មានសប្តាហ៍កន្លងមកនេះ។ នេះបើយោងតាមការចេញផ្សាយរបស់សារព័ត៌មាន Al Jazeera នៅថ្ងៃទី១៩ខែវិច្ឆិកានេះ។

SNGR ដែលជាទីភ្នាក់ងារគ្រប់គ្រងគ្រាអាសន្នរបស់ប្រទេស បាននិយាយនៅក្នុងសេចក្តីថ្លែងការណ៍មួយកាលពីថ្ងៃចន្ទ​ថា ភាពអាសន្នត្រូវបានប្រកាស «ដោយសារតែភ្លើងឆេះព្រៃ ការ​ខ្វះ​ខាត​ទឹក និងគ្រោះរាំងស្ងួត»។

លេខាធិការគ្រប់គ្រង​ហានិ​ភ័យលោក Jorge Carrillo បានប្រាប់អ្នកផ្សាយវិទ្យុក្នុងស្រុក FM Mundo ថា «ប្រទេសទាំងមូលកំពុង​រងការបំផ្លិចបំផ្លាញនៃគ្រោះរាំងស្ងួតដ៏ធំនេះ ដែលបានអូសបន្លាយជិត១២០ថ្ងៃរួចហើយ»។

លោក​បាន​និយាយថា វាមានសារៈសំខាន់ណាស់ក្នុងការប្រើប្រាស់ជំនួយពីលើអាកាស ដើម្បី​ប្រយុទ្ធប្រឆាំងនឹងភ្លើងឆេះព្រៃ ដោយសារតំបន់មានសភាពទ្រុឌទ្រោម ហើយក្នុងករណីខ្លះវាត្រូវចំណាយពេល​៣ម៉ោងដើម្បីពន្លត់ភ្លើងនៅលើដី ខណៈ​ការដាក់រដ្ឋក្នុងភាពអាសន្ននឹងអនុញ្ញាតឱ្យរដ្ឋាភិបាលប្រមូលមូលនិធិ និងបញ្ជូនមនុស្សបន្ថែមទៀតដើម្បីជួយប្រយុទ្ធប្រឆាំងនឹងភ្លើង។

មកដល់ពេលនេះអាជ្ញាធរកំពុងប្រយុទ្ធប្រឆាំងនឹងភ្លើងឆេះព្រៃសកម្មចំនួន​១៣​ដែលបានជះឥទ្ធិពលជាចម្បងទៅលើខេត្ត Azuay និង Loja នៅភាគខាងត្បូងប្រទេសអេក្វាឌ័រ។ សរុបភ្លើង​ឆេះ​ក្នុង​ខេត្ត​ទាំង​ពីរ​នេះ បាន​ប៉ះពាល់​ដល់​ព្រៃឈើ និង​ដី​ប្រមាណ ១០២០០​ហិចតា។

កាលពីខែកញ្ញា ភ្លើងឆេះព្រៃយ៉ាងសន្ធោរសន្ទៅ​​បានគំរាមកំហែងដល់រដ្ឋធានី Quito របស់ប្រទេសនេះ ដោយធ្វើឱ្យមានផ្សែង និងផេះ។ អ្នកពន្លត់អគ្គីភ័យ បុគ្គលិកសង្គ្រោះ និងយោធាជាង២០០០នាក់ត្រូវបានអំពាវនាវឱ្យជម្លៀសអ្នកស្រុក និង​ចូលរួម​ពន្លត់ភ្លើង។

ប្រទេសអេក្វាទ័រកំពុងជួបប្រទះគ្រោះរាំងស្ងួតដ៏អាក្រក់បំផុតរបស់ខ្លួនក្នុងរយៈពេល​៦០ឆ្នាំ ដែលបានប៉ះពាល់ដល់កម្រិតទឹកនៅក្នុងទំនប់វារីអគ្គិសនី ដែលជាប្រភពនៃថាមពលជាង៧០ ភាគរយរបស់ប្រទេស។ ចាប់តាំងពីខែតុលាមករដ្ឋា​ភិបាល​​​ត្រូវកាត់បន្ថយថាមពលប្រចាំថ្ងៃរហូតដល់​១៤​ម៉ោងក្នុងមួយថ្ងៃ ខណៈដែលខ្លួនបានជំរុញឱ្យប្រជាជន១៧ លាននាក់របស់ខ្លួនសន្សំសំចៃថាមពល។

យោងតាមប្រព័ន្ធព័ត៌មានភ្លើងឆេះព្រៃសកល (GWIS) ដែលតាមដានភ្លើងឆេះព្រៃនៅជុំវិញពិភពលោក ការព្យាករណ៍គ្រោះថ្នាក់ភ្លើងឆេះព្រៃរបស់អេក្វាឌ័រត្រូវបានគេរំពឹងថានឹងកើនឡើងពីកម្រិតខ្ពស់ទៅខ្លាំងនៅក្នុងខេត្តដែលរងផលប៉ះពាល់។ ភ្លើងឆេះជាកំណត់ត្រាបានផ្ទុះឡើងនៅក្នុងប្រទេសផ្សេងទៀតនៅទូទាំងអាមេរិកខាងត្បូងផងដែរ រួមទាំងប្រេស៊ីល កូឡុំប៊ី វេណេហ្ស៊ុយអេឡា បូលីវី និងប៉េរូ ដោយសារតំបន់នេះទទួលរងគ្រោះរាំងស្ងួតធ្ងន់ធ្ងរ។

ទីភ្នាក់ងារអវកាសអាមេរិក NASA បានរាយការណ៍ថា ផ្សែងហុយចេញពីលំហអាកាសលើផ្នែកជាច្រើននៃតំបន់ ចាប់ពីខែកក្កដា ដល់ខែតុលា ដែលជាលទ្ធផលនៃភ្លើងឆេះ ខណៈដែលទន្លេនៅក្នុងអាង Amazon បានធ្លាក់ចុះដល់កម្រិតទាបកាលពីខែមុន។ គ្រោះរាំងស្ងួតដែលកាន់តែអាក្រក់ឡើងជាលំដាប់ចាប់តាំងពីពាក់កណ្តាលចុងក្រោយនៃឆ្នាំ ២០២៣ ដែលបានផ្សារភ្ជាប់ទៅនឹងបាតុភូតអាកាសធាតុ El Nino និងការប្រែប្រួលអាកាសធាតុ៕

អត្ថបទ៖ ប៊ុន សុភាព