ព័ត៌មានអន្ដរជាតិ

អេក្វាឌ័រចាប់ខ្លួនមនុស្ស៥នាក់ ពីបទប៉ុនប៉ងធ្វើឃាតប្រធានាធិបតី

បានផុស

៩ ខែ មុន

នៅ

ថ្ងៃពុធ ៨ តុលា ២០២៥

ដោយ

មនុស្សប្រាំនាក់ត្រូវបានចាប់ខ្លួនបន្ទាប់ពីមានការប៉ុនប៉ងធ្វើឃាតលោកប្រធានាធិបតី Daniel Noboa អំឡុងពេលមានការតវ៉ានៅក្នុងប្រទេសអេក្វាឌ័រ។ នេះបើយោងតាមការចេញផ្សាយរបស់សារព័ត៌មាន BBC នៅថ្ងៃទី០៨ខែតុលា។

ប្រធានាធិបតីអេក្វាឌ័រលោក Daniel Noboa (រូបភាព៖ Reuters)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បាតុករប្រហែល ៥០០ នាក់បានគប់ដុំថ្មទៅលើរថយន្តរបស់ប្រធានាធិបតីអេក្វាឌ័រលោក Daniel Noboa ហើយមានសញ្ញាប្រើកាំភ្លើងវាយប្រហារលើរថយន្តផងដែរ។ ទោះយ៉ាងណាលោក Noboa មិនរងរបួសទេ។ ជនសង្ស័យទាំងអស់ត្រូវប្រឈមមុខនឹងការចោទប្រកាន់ពីបទភេរវកម្ម និងការប៉ុនប៉ងធ្វើឃាត។

គួរបញ្ជាក់ថា ការតវ៉ាបានផ្ទុះឡើងបន្ទាប់ពីរដ្ឋាភិបាលបានបញ្ចប់ការឧបត្ថម្ភធនប្រេងសម្រាប់ប្រេងម៉ាស៊ូត ដែលធ្វើឲ្យប្រេងឡើងថ្លៃ។ រដ្ឋាភិបាលនិយាយថាការបញ្ឈប់ការឧបត្ថម្ភធននឹងជួយសន្សំប្រាក់ចំនួន ១.១ ពាន់លានដុល្លារក្នុងមួយឆ្នាំៗដើម្បីជួយកសិករ និងកម្មករដឹកជញ្ជូន ប៉ុន្តែមនុស្សជាច្រើនមានការខឹងសម្បារព្រោះវាបង្កើនថ្លៃរស់នៅរបស់ពួកគេ។

ការតវ៉ាត្រូវបានដឹកនាំដោយ Conaie ដែលជាអង្គការសិទ្ធិជនជាតិដើមភាគតិចដ៏ធំបំផុតរបស់អេក្វាឌ័រ។ ពួកគេបានបិទផ្លូវ និងហែក្បួនអស់រយៈពេលជាងពីរសប្តាហ៍មកហើយ។ Conaie និយាយថា រដ្ឋាភិបាលកំពុងចាប់មនុស្សដោយអយុត្តិធម៌ និងប្រើអំពើហិង្សា ខណៈរដ្ឋាភិបាលហៅការតវ៉ានេះថាជាអំពើឧក្រិដ្ឋកម្ម។

កាលពីសប្តាហ៍មុន ក្បួនរថយន្តរបស់លោកប្រធានាធិបតីក៏ត្រូវបានគេវាយប្រហារផងដែរ ខណៈដែលលោកកំពុងធ្វើដំណើរជាមួយអ្នកការទូតមកពី អង្គការសហប្រជាជាតិ សហភាពអឺរ៉ុប អ៊ីតាលី និងបុរីវ៉ាទីកង់។ ទាហានខ្លះបានរងរបួសនៅក្នុងហេតុការណ៍នេះ។ Conaie មានប្រវត្តិដ៏យូរលង់មកហើយក្នុងការដឹកនាំការតវ៉ាដ៏ធំ និងបានបណ្តេញប្រធានាធិបតីបីនាក់នៅចន្លោះឆ្នាំ ១៩៩៧ និង ២០០៥ ៕