ផ្ទុះបាតុកម្មហិង្សាទូទាំងប្រទេសអេក្វាឌ័រ ដោយសារតម្លៃប្រេងកើនឡើង

ក្រុមអ្នកតវ៉ារាប់ពាន់នាក់បានប៉ះទង្គិចជាមួយប៉ូលិសក្នុងរដ្ឋធានីនៃប្រទេសអេក្វាឌ័រ ខណៈដែលកំហឹងកាន់តែខ្លាំងឡើងចំពោះការសម្រេចចិត្តរបស់ប្រធានាធិបតី Daniel Noboa ក្នុងការបញ្ចប់ការឧបត្ថម្ភធនប្រេងឥន្ធនៈ ដោយធ្វើឲ្យតម្លៃប្រេងម៉ាស៊ូតឡើងពី ១.៨០ ដុល្លារដល់ ២.៨០ ដុល្លារក្នុងមួយ Gallon (៤.៥៥ លីត្រ)។

បាតុកម្មបានផ្ទុះឡើងទូទាំងប្រទេសដឹកនាំដោយក្រុមជនជាតិដើមភាគតិច និងបានអូសបន្លាយរយៈពេលបីសប្តាហ៍មកហើយ។ បាតុកម្មនេះបានប្រែក្លាយទៅជាហិង្សា បណ្តាលឲ្យមនុស្សម្នាក់ស្លាប់ និងរាប់សិបនាក់រងរបួស និងជាង១០០នាក់ត្រូវបានចាប់ខ្លួន។ ប៉ូលិស​បាន​ប្រើ​ឧស្ម័ន​បង្ហូរ​ទឹក​ភ្នែក​ដើម្បី​បំបែក​ក្រុម​បាតុករ​ក្នុង​ទីក្រុង Quito ខណៈ​ដែលប្រធានាធិបតី Noboa បាន​ដាក់​រដ្ឋ​ក្នុង​ភាព​អាសន្ន​ក្នុង​ខេត្ត​ចំនួន ១០។

បើតាមប្រធានាធិបតី Daniel Noboa និយាយថា ការកាត់បន្ថយការឧបត្ថម្ភធនប្រេងឥន្ធនៈគឺចាំបាច់ដើម្បីជួយរដ្ឋាភិបាលសន្សំប្រាក់ចំនួន ១.១ ពាន់លានដុល្លារ និងបញ្ឈប់ប្រជាជនពីការរត់ពន្ធឥន្ធនៈថោកទៅកាន់ប្រទេសជិតខាងដូចជាកូឡុំប៊ី និងប៉េរូ។

ទោះយ៉ាងណាក៏ដោយ មនុស្សជាច្រើន ជាពិសេសកសិករ អ្នកបើកបរ និងគ្រួសារក្រីក្រ និយាយថា ការសម្រេចចិត្តនេះបានធ្វើឱ្យជីវភាពរស់នៅកាន់តែលំបាក ដោយសារឥន្ធនៈឥឡូវនេះមានតម្លៃថ្លៃជាងមុន។ តម្លៃប្រេងឥន្ធនៈខ្ពស់ បង្កើនថ្លៃដឹកជញ្ជូន អាហារ និងទំនិញប្រចាំថ្ងៃ ដែលដាក់សម្ពាធបន្ថែមលើអ្នកដែលមានការលំបាកផ្នែកហិរញ្ញវត្ថុរួចហើយ។

ទោះបីជាលោកប្រធានាធិបតី Noboa បានផ្តល់ប្រាក់លើកទឹកចិត្តតិចតួចដល់ក្រុមមនុស្សមួយចំនួនក៏ដោយ លោកបានបដិសេធមិនជួប ឬពិភាក្សាជាមួយមេដឹកនាំជនជាតិដើមភាគតិចដែលកំពុងដឹកនាំការតវ៉ានោះទេ។ បញ្ហានេះ​បាន​ធ្វើ​ឲ្យ​ប្រជាពលរដ្ឋ​កាន់​តែ​មាន​ការ​ខឹង​សម្បារ និង​ធ្វើ​ឲ្យ​ការ​តវ៉ា និង​ចលាចល​សាធារណៈ​កាន់តែរីក​ធំ​ឡើង​នៅ​ទូទាំង​ប្រទេស៕

អត្ថបទ៖ ប៊ុន សុភាព