អាមេរិក បញ្ជូនវ៉ាក់សាំងកូវីដជាង ៨ លានដូសបន្ថែមមកកាន់ប្រទេសចំនួន ២ នៅអាស៊ី

សហរដ្ឋអាមេរិកបានប្រកាសកាលពីថ្ងៃសុក្រថា ខ្លួនកំពុងបញ្ជូនវ៉ាក់សាំងការពារជំងឺកូវីដ ១៩ Pfizer ជាង ៨ លានដូសទៅប្រទេសបង់ក្លាដែស និងហ្វីលីពីន ក្នុងរលកចុងក្រោយនៃជំនួយដល់ពិភពលោកដែលកំពុងជួបការលំបាក ក្នុងការទប់ទល់នឹងជំងឺរាតត្បាត ។

មន្រ្តីសេតវិមានម្នាក់បានប្រាប់ AFP ក្នុងលក្ខខណ្ឌអនាមិកថា ការដឹកជញ្ជូនចំនួន ៥ ដែលមានវ៉ាក់សាំង សរុបចំនួន ៥,៥៧៥,០៥០ ដូសនឹងទៅដល់ប្រទេសហ្វីលីពីននៅសប្តាហ៍ក្រោយ ។

ចំណែកវ៉ាក់សាំងចំនួន ២,៥០៨,៤៨០ ដូសផ្សេងទៀត នឹងមកដល់ប្រទេសបង់ក្លាដែសនៅដើមសប្តាហ៍ក្រោយ តាមរយៈយន្តការ COVAX របស់អង្គការសុខភាពពិភពលោក (WHO) ។

កន្លងមក ប្រទេសបង់ក្លាដែសដែលរងផលប៉ះពាល់យ៉ាងធ្ងន់ធ្ងរដោយជំងឺកូវីដ ១៩ បានទទួលវ៉ាក់សាំងពីអាមេរិករាប់លានរួចទៅហើយ រួមទាំង ២.៥ លានដូសផ្សេងទៀតដែលត្រូវបានបញ្ជូនមកកាលពីសប្តាហ៍មុន ។

យោងតាមមូលដ្ឋានទិន្នន័យរបស់ AFP បានឲ្យដឹងថា មានតែប្រជាជនប្រហែល ១០ ភាគរយប៉ុណ្ណោះនៃប្រទេសបង់ក្លាដែស ដែលបានទទួលចាក់វ៉ាក់សាំងពេញ ២ ដូស ខណៈនៅហ្វីលីពីនមានតែប្រជាជនពេញវ័យជាងមួយភាគបួនប៉ុណ្ណោះ ទទួលបានការចាក់វ៉ាក់សាំងការពារពេញ ២ ដូស ដោយសារតែយុទ្ធនាការចាក់វ៉ាក់សាំងមានសភាពយឺតយ៉ាវ ៕

ប្រែសម្រួលដោយ ៖ ជីវ័ន្ត

ប្រភព ៖ CNA

ចុចអាន ៖ កូវីដ សម្លាប់មនុស្សលើស ៧០ម៉ឺននាក់នៅ​ អាមេរិក