កូរ៉េខាងជើង ប្រកាសបង្កើតកងទ័ព គ្មានអ្នកណាអាចយកឈ្នះបាន

ស្របពេលកំពុងប្រឈមមុខនឹងគោលនយោបាយអរិភាពពីសហរដ្ឋអាមេរិក មេដឹកនាំកូរ៉េខាងជើង បានប្តេជ្ញាបង្កើត កងទ័ពដែលគ្មានអ្នកណាអាចយកឈ្នះបាន។

លោក គីម ជុងអ៊ុន បានលើកឡើងថា ការអភិវឌ្ឍន៍អាវុធ គឺសម្រាប់ការពារខ្លួនឯង មិនមែនដើម្បីបង្កសង្គ្រាមនោះទេ។

លោក គីម បានធ្វើអត្ថាធិប្បាយបែបនេះ នៅឯពិព័រណ៍ការពារជាតិដ៏កម្រមួយ ដែលមានការបង្ហាញកាំជ្រួចមីស៊ីលធំៗជាច្រើនគ្រាប់។

ថ្មីៗនេះ ប្រទេសកូរ៉េខាងជើង បានសាកល្បងនូវអ្វីដែលខ្លួនអះអាងថា ជាមីស៊ីលល្បឿនលឿនជាងសំឡេងនិងមីស៊ីលប្រឆាំងយន្តហោះថ្មីៗ។

ស្របពេលជាមួយគ្នានោះ ប្រទេសកូរ៉េខាងត្បូង ក៏បានសាកល្បងអាវុធដែលបាញ់ចេញពីនាវាមុជទឹកផ្ទាល់ខ្លួនផងដែរ។

ក្នុងសុន្ទរកថារបស់លោកនៅឯពិព័រណ៍ការពារជាតិឆ្នាំ ២០២១ ដែលរៀបចំឡើងនៅទីក្រុងព្យុងយ៉ាង លោកគីមបាននិយាយអំពីការបង្កើតយោធានៅកូរ៉េខាងត្បូង ហើយបានអះអាងថា កូរ៉េខាងជើងមិនចង់ធ្វើសង្គ្រាមជាមួយប្រទេសជិតខាងទេ។

លោកបានឲ្យដឹងថា “យើងមិននិយាយអំពីសង្គ្រាមជាមួយនរណាម្នាក់ឡើយ ប៉ុន្តែយើងត្រូវការពារសង្រ្គាមដោយខ្លួនឯង និងបង្កើនការការពារអធិបតេយ្យភាពជាតិ”។

ទន្ទឹមនោះ លោកគីម ក៏បានចោទប្រកាន់អាមេរិកផងដែរថា បានបង្កភាពតានតឹងរវាងកូរ៉េខាងជើងនិងកូរ៉េខាងត្បូង។ លោកបានបន្ថែមថា គ្មានអាកប្បកិរិយាណាមួយ ធ្វើឲ្យកូរ៉េខាងជើងជឿជាក់ថា អាមេរិកមិនមានអរិភាពនោះទេ៕

ប្រែសម្រួល៖ Vann Vann

ប្រភព៖ BBC

ចុចអាន៖ កូរ៉េខាងជើង គំរាម UN ឲ្យគិតដល់ផលវិបាក មុននឹងរិះគន់កម្មវិធីមីស៊ីល របស់ខ្លួន