ព័ត៌មានអន្ដរជាតិ

អ្នកមានជំងឺដូចលោក Colin Powell ស្លាប់ម្សិលមិញគ្រោះថ្នាក់ខ្លាំងពេលឆ្លងកូវីដ

បានផុស

៥ years មុន

នៅ

ថ្ងៃអង្គារ ១៩ តុលា ២០២១

ដោយ

អតីតរដ្ឋមន្ត្រីក្រសួងការបរទេសសហរដ្ឋអាមេរិក លោក Colin Powell បានទទួលមរណភាពកាលពីម្សិលមិញដោយសារជំងឺកូវីដ-១៩ក្នុងវ័យ៨៤ឆ្នាំ។ នេះបើយោងតាមគ្រួសាររបស់លោកបានប្រកាស។

តាមសេចក្តីប្រកាសរបស់ក្រុមគ្រួសារបាននិយាយថា ៖«យើងខ្ញុំបានបាត់បងស្វាមី ឪពុក ជីតា និងជាពលរដ្ឋអាមេរិកដ៏អស្ចារ្យម្នាក់។ យើងខ្ញុំចង់អរគុណដល់បុគ្គលិកពេទ្យ សម្រាប់ការប្រឹងប្រែងព្យាបាល»។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់កាសែត The New York Times កាលពីយប់មិញបង្ហាញថា លោក Colin Powell បានទទួលមរណភាពដោយជំងឺកូវីដ-១៩ បើទោះបីជាលោកបានចាក់វ៉ាក់សាំងបង្ការពេញដូសរួចរាល់ហើយក្តី។

កាសែតបន្តដោយយោងតាមក្រុមគ្រួសាររបស់លោកថា ប្រព័ន្ធភាពស៊ាំការពាររាងកាយរបស់លោកបានចុះខ្សោយដោយការព្យាបាលជំងឺមហារីក Myeloma ច្រើនមុខដែលជាមហាកោសិកាឈាមសនៅក្នុងខួរឆ្អឹង។ មនុស្សដែលមានជំងឺមហាកោសិកាឈាមសនៅក្នុងខួរឆ្អឹងគ្រោះថ្នាក់ខ្លាំងណាស់ បន្ទាប់ពីឆ្លងកូវីដ-១៩ដែលវិវឌ្ឍទៅជាធ្ងន់ធ្ងរ។

អ្វីដែលគួរឲ្យកត់សំគាល់ទៀតនោះ វ៉ាក់សាំងក៏ទំនងជាគ្មានប្រសិទ្ធភាពសម្រាប់អ្នកជំងឺប្រភេទនេះផងដែរ។

លោក Colin Powell ជាអតីតមន្ត្រីយោធាកំពូលរបស់សហរដ្ឋអាមេរិកម្នាក់ និងជាជនជាតិអាហ្វ្រិក-អាមេរិកទី១ដែលបានក្លាយជារដ្ឋមន្ត្រីក្រសួងការបរទេសអាមេរិកនៅឆ្នាំ២០០១ក្រោមអាណត្តិប្រធានាធិបតីរបស់គណបក្សសាធារណៈលោក George W Bush៕

ប្រែសម្រួល៖ វីរបុត្រ
ប្រភព៖ The New York Times

Related Topics:កូវីដ-១៩