ស្ងាត់មួយរយៈធំ ពេលនេះ ឥណ្ឌា ដាក់ពង្រាយអាវុធទំនើបៗនៅតំបន់ ជាប់ព្រំដែន ចិន

កងទ័ពឥណ្ឌាបាននិយាយនៅថ្ងៃព្រហស្បតិ៍នេះថា ឥណ្ឌាបានដាក់ពង្រាយកាំភ្លើងធំធុន M-777 និងកាំភ្លើងធុន L-70 Bofors ស៊េរីទំនើបនៅក្នុងទីក្រុង Tawang នៃតំបន់ Ladakh ជាប់ព្រំដែនប្រទេសចិន ។

ដោយដកស្រង់សម្ដីពីទីភ្នាក់ងារព័ត៌មាន ANI លោកមេបញ្ជាការ Sariya Abbasi បាននិយាយថា “កាំភ្លើងរបស់យើងអាចបាញ់ទម្លាក់យានវាយប្រហារគ្មានមនុស្សបើក ឧទ្ធម្ភាគចក្រវាយប្រហារ និងយន្តហោះទំនើបទាំងអស់” ។

លោកបន្តថា “កាំភ្លើងទាំងនេះបានបង្កើនទំនុកចិត្តរបស់យើងបាញ់ចំគោលដៅ និងសមត្ថភាពតាមដានគោលដៅស្វ័យប្រវត្តិនៅគ្រប់លក្ខខណ្ឌអាកាសធាតុទាំងអស់ ជាមួយនឹងការបំពាក់ឧបករណ៍ចាប់សញ្ញាអេឡិចត្រូនិកកម្រិតខ្ពស់ មានកាមេរ៉ាថតរូប និងឧបករណ៍រកកាំរស្មីឡាស៊ែរជាដើម” ។

ទន្ទឹមនោះ កងកម្លាំងប្រដាប់អាវុធឥណ្ឌា ក៏បានបង្កើនការដាក់ពង្រាយយន្តហោះយោធា រួមទាំងយានអាកាសគ្មានមនុស្សបើកនៅក្នុងតំបន់ Arunachal Pradesh ជាប់ព្រំដែនជាមួយប្រទេសចិន ។

គួរបញ្ជាក់ថា ភាពតានតឹងនៅតំបន់ Ladakh រវាងចិន និងឥណ្ឌាបានកើនឡើងកាលពីខែឧសភាឆ្នាំមុន ខណៈបន្ទាប់ពីមានជម្លោះជាច្រើនរវាងអង្គភាពយោធារបស់ប្រទេសនៅក្នុងតំបន់បឹង Pangong ទីក្រុងប៉េកាំង និងក្រុងញូវដេលីបានបង្កើនវត្តមានយោធារបស់ពួកគេនៅតាមព្រំដែន ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ ចិន ចោទ អាមេរិក ថា ឧប្បត្តិហេតុនាវាមុជទឹកនុយក្លេអ៊ែរនៅ សមុទ្រចិនខាងត្បូង ជានយោបាយរបស់ ទីក្រុងវ៉ាស៊ីនតោន