រុស្ស៊ី ក៏កំពុងផលិតថ្នាំកូវីដ ឯប្រសិទ្ធភាពគឺព្យាបាលជា ១០០ ភាគរយ

លោក Denis Logunov អនុប្រធានមជ្ឈមណ្ឌល Gamaleya បាននិយាយកាលពីថ្ងៃអាទិត្យថា មជ្ឈមណ្ឌលស្រាវជ្រាវ Gamaleya របស់រុស្ស៊ីបានផលិតសមាសធាតុគីមីដើម្បីបង្កើតថ្នាំព្យាបាលកូវីដ ហើយរំពឹងថានឹងទទួលបានការអនុម័តនៅចុងឆ្នាំក្រោយ បន្ទាប់ពីការសាកល្បងព្យាបាល ។

លោក Logunov បាននិយាយនៅក្នុងកិច្ចប្រជុំជាមួយប្រធានាធិបតីរុស្ស៊ីលោក Vladimir Putin ថា ថ្នាំកូវីដសម្រាប់ព្យាបាលអង់ទីគ័រ monoclonal ដែលប្រើដើម្បីព្យាបាលអតីតប្រធានាធិបតីអាមេរិក Donald Trump គឺជិតរួចរាល់ហើយ ហើយអាចត្រូវបានរំពឹងថានឹងចុះបញ្ជីក្នុងរយៈពេល ៣ ទៅ ៥ ខែខាងមុខនេះ ។

លោកបានបន្ថែមថា ការព្យាបាលបានបង្ហាញថា មានប្រសិទ្ធភាព ១០០ ភាគរយប្រឆាំងនឹងជំងឺកូវីដ ១៩ ក្នុងការសាកល្បងសត្វ ហើយឥឡូវនេះកំពុងឈានចូលដំណាក់កាលសាកល្បងព្យាបាលលើអ្នកស្ម័គ្រចិត្ត ។

លោក Logunov បាននិយាយថា ម្យ៉ាងវិញទៀតការអភិវឌ្ឍន៍ថ្នាំគីមីនៅតែស្ថិតក្នុងដំណាក់កាលដំបូង ហើយការសាកល្បងលើសត្វគឺត្រូវបានទាមទារ ។

លោក Logunov បានពន្យល់ថា “នៅពេលនេះ យើងបានធ្វើការពិនិត្យដំបូង ហើយយើងមានសមាសធាតុឈានមុខគេ ដែលនឹងត្រូវបានធ្វើឲ្យប្រសើរ និងសាកល្បងនៅក្នុងការពិសោធន៍លើសត្វ” ។

លោក Logunov បានបន្ថែមថា ការបង្កើតថ្នាំព្យាបាលកូវីដត្រូវការពេលវេលាច្រើនជាងការបង្កើតថ្នាំព្យាបាលអង់ទីគ័រ monoclonal ។ លោក​បាន​សម្តែង​ក្តី​សង្ឃឹម​ថា ​ថ្នាំ​នេះ​នឹង​ត្រូវ​បាន​ចុះ​បញ្ជី​នៅ​ចុង​ឆ្នាំ​២០២២ បន្ទាប់​ពី​ការ​សាកល្បង​ព្យាបាលលើ​សត្វ​ដោយ​ជោគជ័យ ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ នាវា រុស្ស៊ី ដឹកប្រេង ២ លានបារ៉ែលទៅ អាមេរិក ដោយកម្រ