ចិន​ព្រមាន​អង់គ្លេស​ អាមេរិក​ កាណាដា​ និង​អូស្ត្រាលី​ នឹង​សង់ថ្លៃ​ចំពោះ​ធ្វើ​ពហិការពី​កីឡា​អូឡាំពិក

ប្រទេសចិនបានធ្វើការព្រមានចក្រភពអង់គ្លេស សហរដ្ឋអាមេរិក កាណាដា និងអូស្ត្រាលីថាពួកគេតនឹងត្រូវសង់ថ្លៃសម្រាប់ការធ្វើពហិការការទូតពីព្រឹត្តិការណ៍កីឡាអូឡាំពិករដូវរងាក្រុងប៉េកាំង។

រដ្ឋាភិបាលក្រុងវ៉ាស៊ីនតោនបានប្រកាសក្នុងសប្តាហ៍នេះពីការធ្វើពហិការការទូតផ្លូវការពីព្រឹត្តិការណ៍កីឡាអូឡាំពិករដូវរងានៅប្រទេសចិននាខែកុម្ភៈខាងមុខនេះ និងនិយាយថា ដោយសារការរំលោភសិទ្ធិមនុស្សលើក្រុមជនជាតិភាគតិចមូស្លីម Uyghur នៅចិនទើបបានជាសម្រេចចិត្តបែបនេះ។

បន្ទាប់មក នៅថ្ងៃពុធ ចក្រភពអង់គ្លេស អូស្ត្រាលី និងកាណាដា ក៏បានប្រកាសពីការធ្វើពហិការការទូតពីកីឡាអូឡាំពិកដែរ។ ប្រការនេះបានធ្វើឲ្យរដ្ឋាភិបាលក្រុងប៉េកាំង​ខឹងសម្បារយ៉ាងខ្លាំង និងបង្ហើបពីការសងសឹងវិញកាលពីថ្ងៃព្រហស្បតិ៍ម្សិលមិញ។

លោក Wang Wenbin អ្នកនាំពាក្យក្រសួងការបរទេសចិនបានប្រាប់អ្នកកាសែតថា ការប្រើប្រាស់វេទិកាកីឡា​អូឡាំពិក​ដើម្បីជាឩបាយកល់នយោបាយរបស់អាមេរិក អូស្ត្រាលី អង់គ្លេស និងកាណាដា គឺមិនពេញនិយម និងឯកោខ្លួនឯង ហើយពួកគេនឹងសងថ្លៃដោយជៀសមិនផុតចំពោះកំហុសឆ្គងរបស់ពួកគេ។

ការព្រមាននេះបានធ្វើឡើង ស្របពេលប្រទេសបារាំងបាននិយាយថា ខ្លួននឹងមិនធ្វើពហិការពីកីឡាអូឡាំពិកខាងមុខនេះទេ ពីព្រោះកីឡាគឺជាពិភពលោកមួយនៅក្នុងខ្លួនរបស់វាដែលត្រូវតែការពារពីការជ្រៀតជ្រែករឿងនយោបាយ។

ជាមួយគ្នានេះ ប្រទេសរុស្ស៊ីបានរិះគន់ចំពោះការសម្រេចចិត្តរបស់អាមេរិក និងនិយាយថា កីឡាអូឡាំពិក ឆ្នាំ​២០២២​មិន​គួរ​ពាក់ព័ន្ធនឹងបញ្ហានយោបាយ​ឡើយ។ លោកប្រធានាធិបតីរុស្ស៊ី វ្លាឌីមៀរ ពូទីន បានទទួលការអញ្ជើញរួចហើយពីលោកប្រធានាធិបតីចិន ស៊ី ជីនពីង ដើម្បីចូលរួម។

ចំណែកប្រធានគណៈកម្មាធិការអូឡាំពិកអន្តរជាតិ លោក Thomas Bach បាននិយាយកាលពីថ្ងៃពុធថា លោកបានកំពុងរក្សានយោបាយឲ្យមានអព្យាក្រឹតលើបញ្ហានេះ និងទទួចពីចំណុចសំខាន់របស់កីឡាអូឡាំពិកគឺការចូលរួមប្រកួតរបស់អត្តពលិក។

ប្រទេសទាំង៤ដែលបានប្រកាសធ្វើពហិការនេះមានទំនាក់មិនសូវល្អប្រសើរទេជាមួយចិនក្នុងរយៈពេលប៉ុន្មានឆ្នាំចុងក្រោយ៕

ប្រែសម្រួល៖ វីរបុត្រ
ប្រភព៖ dailymail