ក្រៅពីហាមមិនឲ្យសើចថ្ងៃកាន់ទុក្ខឪពុក គីម ជុងអ៊ុន កូរ៉េខាងជើង ឲ្យប្រជាជនធ្វើរឿងទាំងនេះទៀត

នៅ ថ្ងៃសុក្រ ទី១៧ ខែធ្នូ កូរ៉េខាងជើងបានប្រារព្ធខួបលើកទី ១០ នៃការទទួលមរណភាពរបស់ប្រមុខរដ្ឋមុនគឺលោក គីម ជុងអ៊ីល ដោយហាមពលរដ្ឋមិនឲ្យសើច និងផឹកស្រា ក៏ដូចជាមិនឲ្យបង្ហាញអារម្មណ៍សប្បាយរីករាយនៅ កន្លែងដែលមានមនុស្សច្រើន ឬចូលរួមក្នុងសកម្មភាពកម្សាន្តណាមួយផងដែររយៈពេល ១១ ថ្ងៃ ក្នុងអំឡុងពេលកាន់ទុក្ខនេះ ។

យោងតាមទីភ្នាក់ងារសារព័ត៌មាន AP បានឲ្យដឹងថា នៅ ពេលថ្ងៃត្រង់ ប្រជាពលរដ្ឋនៃប្រទេសនេះត្រូវបានគេសង្កេតឃើញមានភាពស្ងៀមស្ងាត់រយៈពេល ៣ នាទី ខណៈដែលមនុស្សរាប់លាននាក់បានរួមគ្នាឱនក្បាលគោរពទៅ កាន់ឪពុករបស់លោក គីម ជុងអ៊ុន ។

ទន្ទឹមនោះ ទង់ជាតិ​នៅ ​កូរ៉េ​ខាងជើង​ត្រូវ​បានបង្ហូតមកត្រឹម​ពាក់​កណ្តាល ហើយ​រថយន្ត កប៉ាល់ និង​រថភ្លើង​បាន​បន្លឺសំឡេងស៊ីភ្លេ​ ហើយប្រជាជនកូរ៉េខាងជើងជាច្រើនបានទៅ ទស្សនាវិមាន Mansu Hill ក្នុងទីក្រុងព្យុងយ៉ាង ដើម្បីដាក់កម្រងផ្កា និងគោរពនៅ មុខរូបសំណាកដ៏ធំរបស់លោក គីម ជុងអ៊ីល និងឪពុករបស់គាត់គឺលោក គីម អ៊ីលស៊ុង ។

គួរបញ្ជាក់ថា កើតនៅ ថ្ងៃទី ១៦ ខែកុម្ភៈ ឆ្នាំ ១៩៤២ លោក គីម ជុងអ៊ីល បានកាន់កាប់ជាមេដឹកនាំកូរ៉េខាងជើងក្នុងឆ្នាំ ១៩៩៤ បន្ទាប់ពីការទទួលមរណភាពរបស់ប្រមុខរដ្ឋមុន និងជាឪពុករបស់គាត់គឺលោក គីម អ៊ីលស៊ុង ក្នុងឆ្នាំដដែលនោះ ។ លោក​បាន​គ្រប់គ្រង​ប្រទេស​រហូត​ដល់ទទួលមរណភាព​ក្នុង​ឆ្នាំ ២០១១ ​ជា​ពេល​ដែល​​កូន​ប្រុស​លោក គីម ជុងអ៊ុន ស្នង​តំណែង ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ កូរ៉េខាងជើង ហាមមិនឲ្យប្រជាជនសើច និង​ផឹកស្រា ក្នុងខួប ១០ ឆ្នាំមរណភាពឪពុក គីម ជុងអ៊ុន (មានវីដេអូ)