កូរ៉េខាងជើង ហាមមិនឲ្យប្រជាជនសើច និង​ផឹកស្រា ក្នុងខួប ១០ ឆ្នាំមរណភាពឪពុក គីម ជុងអ៊ុន (មានវីដេអូ)

វិទ្យុ RFA បានរាយការណ៍ថា រដ្ឋាភិបាលនៃប្រទេសកូរ៉េខាងជើង បានហាមពលរដ្ឋមិនឲ្យសើច និងផឹកស្រារយៈពេល ១១ ថ្ងៃ ក្នុងខួបនៃមរណភាពរបស់លោក គីម ជុងអ៊ីល ។

យោងតាមសេវាព័ត៌មានដែលគ្រប់គ្រងដោយសហរដ្ឋអាមេរិកបានឲ្យដឹងថា ប្រជាជនកូរ៉េខាងជើងត្រូវបានហាមឃាត់មិនឲ្យបង្ហាញអារម្មណ៍សប្បាយរីករាយនៅ កន្លែងដែលមានមនុស្សច្រើន ។ ការហាមប្រាមនេះត្រូវបានគេនិយាយថាចូលជាធរមាន ក្នុងអំឡុងពេលព្រឹត្តិការណ៍រំលឹកខួប ១០ ឆ្នាំនៃការស្លាប់របស់លោកគីម ជុងអ៊ីល ។

ពលរដ្ឋម្នាក់នៃទីក្រុងជាប់ព្រំដែនភាគឦសាន Sinuiju បានប្រាប់វិទ្យុ RFA ថា “ក្នុងអំឡុងពេលកាន់ទុក្ខនោះ ប្រជាពលរដ្ឋមិនត្រូវផឹកស្រា សើច ឬចូលរួមក្នុងសកម្មភាពកម្សាន្តណាមួយនោះទេ” ។

ទន្ទឹមនោះ ប្រជាពលរដ្ឋត្រូវបានហាមប្រាមមិនឲ្យដើរទិញឥវ៉ាន់នៅ ថ្ងៃទី១៧ ខែធ្នូនេះ ដែលជាថ្ងៃគម្រប់ខួបនៃមរណភាពឪពុករបស់លោក គីម ជុងអ៊ុន ប៉ុន្តែអាជ្ញាធរក៏បានចាត់ឲ្យក្រុមមន្ត្រីនគរបាលពិសេសមួយក្រុម ធ្វើយ៉ាងណាកុំឲ្យប្រជាពលរដ្ឋស្រងូតស្រងាត់ពេកផងដែរ ។

ប្រភព​ដដែល​បាន​បន្ត​ថា “ក្នុង​ពេល​កាន់ទុក្ខ សូម្បី​សមាជិក​គ្រួសារ​របស់​អ្នក​ស្លាប់​ ក៏​មិន​ត្រូវ​បាន​អនុញ្ញាតឲ្យ​យំ​ខ្លាំង​ដែរ ហើយ​ពិធីបុណ្យ​សព​អាច​ធ្វើ​ឡើង​បាន ​លុះត្រាតែ​ព្រឹត្តិការណ៍​ទាំងអស់​ត្រូវ​បាន​បញ្ចប់” ​។

អ្នកស្រុកបានរាយការណ៍បន្ថែមថា “កាលពីមុន មនុស្សជាច្រើនដែលផឹកស្រា ឬស្រវឹង ក្នុងអំឡុងពេលកាន់ទុក្ខត្រូវចាប់ខ្លួន និងចាត់ទុកជាឧក្រិដ្ឋជនមនោគមវិជ្ជា ហើយពួក​គេ​ត្រូវ​បាន​គេ​យក​ទៅ ​ឆ្ងាយ ហើយក្រោយមក​មិន​ឃើញមកវិញ​ទេ ។

គួរបញ្ជាក់ថា លោក គីម ជុងអ៊ីល ឪពុករបស់លោក គីម ជុងអ៊ុន ដែលបានគ្រប់គ្រងប្រទេសអស់រយៈពេល ១៧ ឆ្នាំបានស្លាប់ដោយសារគាំងបេះដូងនៅ ថ្ងៃទី ១៧ ខែធ្នូ ឆ្នាំ ២០១១ ក្នុងវ័យ ៦៩ ឆ្នាំ ៕

សូមទស្សនាវីដេអូ!

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ ជីតា គីម ជុងអ៊ុន ទទួលមរណភាពហើយ ក្នុងវ័យ ១០១ ឆ្នាំ