ព័ត៌មានអន្ដរជាតិ

មេដឹកនាំប្រេស៊ីលបដិសេធជំនួយពីអាហ្សង់ទីនសម្រាប់គ្រោះទឹកជំនន់

បានផុស

៤ years មុន

នៅ

ថ្ងៃសុក្រ ៣១ ធ្នូ ២០២១

ដោយ

លោកប្រធានាធិបតីប្រេស៊ីល Jair Bolsonaro បានបដិសេធទទួលយកជំនួយសប្បុរសធម៌ពីប្រទេសអាហ្សង់ទីន ដោយបាននិយាយកាលពីថ្ងៃព្រហស្បតិ៍ថា ប្រទេសលោកមិនត្រូវការជំនួយទេសម្រាប់ការដោះស្រាយគ្រោះទឹកជំនន់សម្លាប់មនុស្សជាច្រើននាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការលើកឡើងរបស់លោកប្រធានាធិបតីរូបនេះទទួលបានការស្តីបន្ទោសពីអភិបាលរដ្ឋ Bahia ដែលជាកន្លែងរងគ្រោះ និងបាននិយាយថា អាជ្ញាធរមូលដ្ឋានស្វាគមន៍សម្រាប់ជំនួយពីប្រទេសណាមួយ ហើយបញ្ជាក់ថា ប្រទេសផ្សេងអាចទាក់ទងផ្ទាល់ទៅរដ្ឋរបស់លោកតែម្តង។

រហូតដល់ពេលនេះ យ៉ាងហោចណាស់មនុស្ស២៤នាក់បានស្លាប់ និងមនុស្សរាប់ពាន់នាក់គ្មានផ្ទះសម្បែងនៅពេលភ្លៀងធ្លាក់ខ្លាំងជាប់កំណត់ត្រាបង្កជាទឹកជំនន់ធ្ងន់ធ្ងរនៅភាគខាងជើង បណ្តាលឲ្យខូចវារីអគ្គីសនី ហើយទឹកទន្លេឡើងខ្ពស់ខុសពីធម្មតា។

អភិបាលរដ្ឋ Bahia លោក Rui Costa បានហៅទឹកជំនន់នេះថាជា«គ្រោះមហន្តរាយអាក្រក់បំផុត»មិនធ្លាប់មានក្នុងប្រវត្តិសាស្ត្ររបស់រដ្ឋ និងបានបញ្ជាក់ថា ផ្នែកធំរបស់រដ្ឋ Bahia មើលទៅដូចជាត្រូវបានបំផ្លាញដោយការទម្លាក់គ្រាប់បែក។

នៅថ្ងៃព្រហស្បតិ៍ Jair Bolsonaro បាននិយាយតាមការបង្ហោះលើ Twitter ថា រដ្ឋាភិបាលអាហ្សង់ទីននឹងបញ្ចូនមនុស្ស១០នាក់សម្រាប់ដំឡើងជម្រកបណ្តោះអាសន្ន ផ្តល់ប្រើប្រាស់ និងសម្ភារៈសង្គ្រោះ។

លោកបានសរសេរថា ទោះជាយ៉ាងណា ការផ្តល់ជំនួយនេះថ្លៃណាស់សម្រាប់ប្រេស៊ីល។ អាជ្ញាធរប្រេស៊ីលបានកំពុងផ្តល់សេវាកម្មរួចរាល់ហើយ។ លោកបន្ថែមថា ប្រេស៊ីលបានទទួលយកជំនួយពីទីភ្នាក់ងារជំនួយអន្តរជាតិរបស់ប្រទេសជប៉ុន និងប្រហែលជាទទួលយកជំនួយពីអាហ្សង់ទីន នៅពេលត្រូវការ។

លោកបញ្ជាក់ថា ៖«រដ្ឋាភិបាលប្រេស៊ីលបើកចំហរចំពោះជំនួយ និងការបរិច្ចាគអន្តរជាតិ»។

លោក Costa ដែលជាអភិបាលរដ្ឋឆ្វេងនិយម Bahia និងជាអ្នកនយោបាយរិះគន់ Bolsonaro បានឆ្លើយតបថា ៖«ខ្ញុំសូមនិយាយទៅកាន់ប្រទេសទាំងអស់ទូទាំងពិភពលោក រដ្ឋ Bahia នឹងទទួលយកដោយផ្ទាល់ ដោយមិនចាំបាច់ឆ្លងកាត់ការទូតរបស់ប្រេស៊ីលទេ ក្នុងទម្រង់ជំនួយអ្វីក៏ដោយពេលនេះ»៕

ប្រែសម្រួល៖ វីរបុត្រ
ប្រភព៖ reuters