ក្រោយពិភាក្សាជាមួយសម្ដេចតេជោ មេដឹកនាំ មីយ៉ាន់ម៉ា គាំទ្រកិច្ចខិតខំប្រឹងប្រែងសន្តិភាព អាស៊ាន

មេដឹកនាំយោធាមីយ៉ាន់ម៉ាតាមសេចក្តីរាយការណ៍បានយល់ព្រមគាំទ្រសមាគមប្រជាជាតិអាស៊ីអាគ្នេយ៍ (អាស៊ាន) ខណៈនឹងធ្វើការដើម្បីស្តារសន្តិភាពនៅក្នុងប្រទេសរបស់ខ្លួន ។

លោកឧត្តមសេនីយ៍ Min Aung Hlaing បានសន្យាបែបនេះនៅក្នុងសេចក្តីថ្លែងការណ៍រួមមួយកាលពីថ្ងៃសុក្រ បន្ទាប់ពីបានជួបជាមួយសម្ដេចនាយករដ្ឋមន្ត្រី ហ៊ុន សែន ដែលកំពុងបំពេញទស្សនកិច្ចនៅមីយ៉ាន់ម៉ាជាលើកដំបូង ។

សេចក្តីថ្លែងការណ៍បាននិយាយថា មេដឹកនាំយោធាក៏នឹងជួយបេសកជនពិសេសអាស៊ានក្នុងការសម្របសម្រួលកិច្ចសន្ទនារវាងយោធា និងកងកម្លាំងគាំទ្រលទ្ធិប្រជាធិបតេយ្យ ហើយលោកនឹងបន្តបទឈប់បាញ់ជាមួយកងជីវពលជនជាតិភាគតិចរហូតដល់ដំណាច់ឆ្នាំនេះ ។

លោក Min Aung Hlaing ដែលបានដឹកនាំរដ្ឋប្រហារកាលពីខែកុម្ភៈកន្លងទៅ បច្ចុប្បន្នត្រូវបានហាមឃាត់មិនឲ្យចូលរួមក្នុងអាស៊ាន ដោយសារការបន្តការបង្ក្រាបរបស់យោធាលើសកម្មជន ។

យោធាមីយ៉ាន់ម៉ាមានការស្ទាក់ស្ទើរក្នុងការទទួលយកអ្នកសម្រុះសម្រួល បើទោះបីជាពីមុនបានបង្ហាញការគាំទ្រចំពោះបេសកជនពិសេសរបស់អាស៊ានប្រចាំប្រទេស និងយល់ព្រមលើបទឈប់បាញ់ក៏ដោយ ។

គួរបញ្ជាក់ថា កម្ពុជា​ជា​ប្រធាន​ប្ដូរ​វេន​របស់​អាស៊ាន​នៅ​ឆ្នាំ​នេះ ហើយសម្ដេចតេជោ ហ៊ុន សែន បង្ហាញ​ឆន្ទៈ​របស់សម្ដេច​ក្នុង​ការ​នាំ​មីយ៉ាន់ម៉ា​ត្រឡប់​មក​ក្នុង​កិច្ច​ប្រជុំ​កំពូល​របស់អាស៊ាន​វិញ ខណៈអាស៊ាន​ត្រូវ​បាន​គេ​រំពឹង​ថា​នឹង​ពិភាក្សា​រក​វិធី​ដោះស្រាយ​ជាមួយ​មីយ៉ាន់ម៉ា​ដោយ​ផ្អែក​លើ​លទ្ធផល​នៃ​ដំណើរ​ទស្សនកិច្ច​របស់​សម្ដេចតេជោ ហ៊ុន សែន ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ មីយ៉ាន់ម៉ា ការពារខ្លាំងទាំងនៅអាកាសយានដ្ឋានណៃពិដោ រហូតដល់ស្ថានទូត កម្ពុជា