មីយ៉ាន់ម៉ា ការពារខ្លាំងទាំងនៅអាកាសយានដ្ឋានណៃពិដោ រហូតដល់ស្ថានទូត កម្ពុជា

អាជ្ញាធរមីយ៉ាន់ម៉ាបានអនុវត្តវិធានការសន្តិសុខយ៉ាងតឹងរ៉ឹងក្នុងក្រុងទីក្រុងណៃពិដោ និងទីក្រុងយ៉ាំងហ្គោន ដោយសារដំណើរទស្សនកិច្ចការទូតរបស់សម្ដេច ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាទៅក្រុងណៃពិដោរបស់ប្រទេសមីយ៉ាន់ម៉ា ។

ទន្ទឹមនោះ ក្រុមមន្ត្រីមីយ៉ាន់ម៉ាក៏បានដាក់ពង្រាយបុគ្គលិកសន្តិសុខបន្ថែម ក៏ដូចជាបិទផ្លូវនៅជិតអាកាសយានដ្ឋានអន្តរជាតិណៃពិដោ និងកន្លែងព្រឹត្តិការណ៍ណាមួយផ្សេងទៀត ខណៈវិធានការរឹតបន្តឹងក៏បានធ្វើឡើងនៅស្ថានទូតកម្ពុជានៅទីក្រុងយ៉ាំងហ្គោនផងដែរ ។

គួររំឭកថា នៅវេលាម៉ោងប្រមាណ ១០ និង ១៥ នាទីព្រឹកម៉ោងនៅក្នុងប្រទេសកម្ពុជានាថ្ងៃទី ៧ ខែមករា ឆ្នាំ ២០២២ នេះ សម្ដេចតេជោ ហ៊ុន សែន​ នាយករដ្ឋមន្ត្រីនៃកម្ពុជា និងគណៈប្រតិភូជាន់ខ្ពស់នៃរាជរដ្ឋាភិបាលកម្ពុជា​ បានអញ្ជើញទៅដល់ប្រទេសមីយ៉ាន់ម៉ាហើយ ដើម្បីបំពេញទស្សនកិច្ចការងារចំនួន ២ ថ្ងៃ ពោលចាប់ពីថ្ងៃទី ៧ ដល់ថ្ងៃទី ៨ ខែមករា ឆ្នាំ ២០២២ នេះ ។

នៅឯអាកាសយានដ្ឋានណៃពិដោ មានការទទួលស្វាគមន៍យ៉ាងរាក់ទាក់ និងកក់ក្ដៅជាទីបំផុតរបស់មន្ត្រីជាន់ខ្ពស់នៃប្រទេសមីយ៉ាន់ម៉ា ចំពោះវត្តមានរបស់សម្ដេចតេជោនាយករដ្ឋមន្ត្រី និងគណៈប្រតិភូជាន់ខ្ពស់របស់រាជរដ្ឋាភិបាលកម្ពុជាជាច្រើនរូបទៀត ៕

ប្រែសម្រួលដោយ ៖ ជីវ័ន្ត

ប្រភព ៖ Garda World

ចុចអាន ៖ សារព័ត៌មានល្បីៗលើលោកចុះផ្សាយព្រោងព្រាតពីដំណើររបស់សម្ដេចតេជោ ហ៊ុន សែន ទៅកាន់ មីយ៉ាន់ម៉ា