ទ័ព​​អាមេរិក​​ទៅ​​ដល់​​ប៉ូឡូញ​​​​ដើម្បី​​ពង្រឹង​កម្លាំង​​​សម្ព័ន្ធ​​មិត្ត​​​អឺរ៉ុប​​ខាង​កើត

យន្តហោះ​ដឹក​កង​ទ័ព​អាមេរិក​បាន​ចុះ​ចត​នៅ​ប្រទេស​ប៉ូឡូញ​កាល​ពី​ថ្ងៃ​អាទិត្យ​ម្សិលមិញ​​ដែល​នេះ​ជា​គោល​ដៅ​របស់​រដ្ឋាភិបាល​ក្រុង​វ៉ាស៊ីនតោន​ដើម្បី​ពង្រឹង​កម្លាំង​​ទ័ព​សម្ព័ន្ធ​មិត្ត​​ណាតូ​នៅ​អឺរ៉ុប​ខាង​កើត​ចំពេល​ភាព​តាន​តឹង​នៅ​ព្រំ​ដែម​រុស្ស៊ី-អ៊ុយក្រែន។

ប្រធានាធិបតី​អាមេរិក លោក ចូ បៃដិន កាល​ពី​ងថ្ងៃ​ពុធ​បាន​បញ្ជា​ឲ្យ​បញ្ជូន​កម្លាំង​ទ័ព​ជិត​៣​ពាន់​នាក់​ទៅ​ប្រទេស​ប៉ូឡូញ និង​រ៉ូម៉ានី ខណៈ​ទី​ក្រុង​វ៉ាស៊ីន​តោន​​​ចាត់​វិធានការ​​ដើម្បី​ធានា​ដល់​សម្ព័ន្ធ​មិត្ត​កុំ​ឲ្យ​មាន​ភាព​ច្របូក​ច្របល់។

មន្ទីរ​បញ្ចកោណ​បាន​និយាយ​ថា សមាជិក​សេវាកម្ម​ប្រមាណ​១៧០០​នាក់​ដែល​ភាគ​ច្រើន​មក​ពី​​កង​ពល​ជើង​​អាកាស​ទី​៨២​​នឹង​ដាក់​ពង្រាយ​ពី​បន្ទាយ Fort Bragg ភាគ​ខាង​ជើង​រដ្ឋ​ខូរ៉ូលីណា ទៅ​កាន់​​ប្រទេស​ប៉ូឡូញ។

ការ​ទៅ​ដល់​យន្ត​ហោះ​ចម្បាំង C-17 ​កាល​ពី​ថ្ងៃ​អាទិត្យ បន្ទាប់​ពី​យន្តហោះ​មួយ​​គ្រឿង​ដឹក​មេ​បញ្ជាការ​កង​ទព​ជើង​អាកាស​ទី​៨២​ លោក​ Christopher Donahue បាន​ទៅ​ដល់​កាល​ពី​ថ្ងៃ​សៅរ៍​នៅ​ព្រលាន​យន្តហោះ Rzeszow-Jasionka និង​យន្តហោះ​​អាមេរិក​ពីរ​បីគ្រឿង​ទៀត​ដែល​ដឹក​សម្ភារៈ​យោធា និង​​ក្រុម​​នាំ​មុខ​មុន។

វា​មិន​ច្បាស់​ទេ​ថា តើ​កម្លាំង​ទ័ព​ចំនួន​ប៉ុន្មាន​នាក់​បាន​ទៅ​ដល់ ប៉ុន្តែ​យន្តហោះចម្បាំង C-17 អាច​ផ្ទុក​កង​ទ័ព​អាកាស​​បាន​១០២នាក់ និង​គ្រឿ​ងសព្វាវុធ។ នេះ​បើ​យោង​តាម​វេបសាយរបស់​កង​ទ័ព​អាកាស​អាមេរិក។

លោក Donahue បាន​និយាយ​កាល​ពី​ថ្ងៃ​អាទិត្យ​ថា ៖«​ការរួម​ចំណែក​ជាតិ​របស់​ពួក​យើង​នៅ​ទី​នេះក្នុង​ប្រទេស​ប៉ូឡូញ​បង្ហាញ​ពី​សាមគ្គីភាព​ជា​មួយ​សម្ព័ន្ធ​មិត្ត​របស់​យើង​ទាំង​អស់​នៅ​ទី​នេះ​គឺ​អឺរ៉ុប ហើយ​ជាក់​ស្តែង​កំឡុង​ពេល​មាន​ភាព​ច្របូក​ច្របល់​បែប​នេះ យើង​ដឹង​ថា យើង​រឹត​តែ​រឹង​មាំ»៕

ប្រែ​សម្រួល៖ វីរបុត្រ
ប្រភព៖ Reuters