អាមេរិក​​​​បាន​​​ជម្លៀស​​មន្ត្រី​​ទូត​​របស់​​ខ្លួន​ចេញ​​ពី​​អ៊ុយក្រែនហើយ

រដ្ឋមន្ត្រីក្រសួងការបរទេសអាមេរិក លោក Antony Blinken បាននិយាយថា ការគំរាមកំហែងកាន់​តែ​ខិត​ជិត​ដល់នៃសកម្មភាពយោធារបស់ប្រទេសរុស្ស៊ីនៅក្នុងប្រទេសអ៊ុយក្រែនគឺជាភាពត្រឹមត្រូវដែលអាមេរិកសម្រេចចិត្តជម្លៀសមន្ត្រីទូតរបស់ខ្លួនចេញពីទីក្រុងគៀវ។

សំដីការពារខ្លួន​ចំពោះ​ការ​សម្រេចចិត្ត​របស់លោកបានកើតមានឡើង បន្ទាប់ពីប្រធានាធិបតីអ៊ុយក្រែនបានជំរុញឲ្យស្ងប់ស្ងាត់ ដោយបាននិយាយថា សត្រូវធំបំផុតគឺការភ័យស្លន់ស្លោ។

ប្រទេសជាច្រើនផ្សេងទៀតបានជំរុញឲ្យពលរដ្ឋរបស់ខ្លួនចាកចេញពីអ៊ុយក្រែន។

រដ្ឋាភិបាលក្រុងមូស្គូដែលបានដាក់ពង្រាយកម្លាំងទ័ពជាង១០ម៉ឺននាក់នៅព្រំដែនអ៊ុយក្រែនបានបដិសេធចំពោះផែនការវាយប្រហារណាមួយ។

ទីប្រឹក្សានយោបាយការបរទេសកំពូលរបស់វិមានក្រឹមឡាំង លោក Yuri Ushakov បានច្រានចោលការព្រមាននៃការ​ប្រវាយប្រហាររបស់សហរដ្ឋអាមេរិកដោយបាននិយាយថា អារម្មណ៍ហួសហេតុមិនអាចគ្រប់គ្រងបានឈានដល់កម្រិតកំពូលហើយ។

វិបត្តិបានកើតមានឡើងរយៈពេល៨ឆ្នាំ បន្ទាប់ពីរុស្ស៊ីបានដណ្តើមគ្រប់គ្រងតំបន់ Crimea ភាគខាងត្បូងអ៊ុយក្រែន។ ចាប់តាំងពីពេលនោះមក យោធាអ៊ុយក្រែនបានជាប់គាំងនៅក្នុងសង្គ្រាមជាមួយនឹងពួកឧទ្ទាមគាំទ្រដោយរុស្ស៊ីនៅតំបន់ភាគខាងកើតជិតព្រំដែនរុស្ស៊ី។

កាលពីថ្ងៃសៅរ៍កន្លងទៅឃើញមានការប៉ុនប៉ងបន្ថែមដើម្បីកាត់បន្ថយភាពតឹងក្នុងតំបន់។ ក្នុងការហៅទូរសព្ទមួយ លោកប្រធានាធិបតីសហរដ្ឋអាមេរិក ចូ បៃដិន បានព្រមានមេដឹកនាំរុស្ស៊ី វ្លាឌីមៀរ ពូទីន អំពីការទទួលរង​ផល​អាក្រក់​យ៉ាងឆាប់រហ័ស និងធ្ងន់ធ្ងរ ប្រសិនបើរុស្ស៊ីបញ្ជូនកងទ័ព។

ទន្ទឹមជាមួយគ្នានេះ រដ្ឋមន្ត្រីក្រសួងការពារជាតិអង់គ្លេសលោក Ben Wallace បានប្រៀបធៀបកិច្ចខិតខំប្រឹងប្រែងផ្លូវការទូតរបស់លោកខាងលិចថ្មីៗនេះដើម្បីបញ្ឈប់ការលុកលុយទៅនឹងការឈ្លានពានរបស់ណាស៊ីអាល្លឺម៉ង់។

ចក្រភពអង់គ្លេស អាមេរិក និងអាល្លឺម៉ង់ជាដើមស្ថិតក្នុងចំណោមប្រទេសជាច្រើនដែលជំរុញឲ្យពលរដ្ឋរបស់ខ្លួនចាកចេញពីអ៊ុយក្រែនជាបន្ទាន់។

ការសម្រេចចិត្តរបស់អាមេរិកដើម្បីជម្លៀសមន្ត្រីទូតរបស់ខ្លួនភាគច្រើនចេញពីទីក្រុងគៀវត្រូវបានធ្វើតាមស្រដៀងគ្នានឹងចំណាត់ការរបស់ប្រទេសកាណាដា និងអូស្ត្រាលី។ ប្រទេសទាំង៣នេះបានផ្លាស់ប្រូរប្រតិបត្តិការទៅភាគខាងលិចទីក្រុង Lviv ជិតព្រំដែនប៉ូឡូញ ទោះជាឯកអគ្គរាជទូតអង់គ្លេសបាននិយាយថា លោកស្រីនឹងស្ថិតនៅប្រទេសអ៊ុយក្រែនជាមួយក្រុមស្នូលក៏ដោយ។

លោក Blinken បាននិយាយថា ហានិភ័យនៃសកម្មភាពយោធាគឺ«ខ្ពស់គ្រប់គ្រាន់ និងការគំរាមកំហែងកាន់​តែ​ជិតមកដល់មែនទែន»ដែលការជម្លៀសគឺជាការប្រុងប្រយ័ត្ន​មុន​ត្រូវធ្វើ។

ប៉ុន្តែប្រធានាធិបតីអ៊ុយក្រែន លោក Volodymyr Zelensky បានជំរុញឲ្យស្ងប់ស្ងាត់ ដោយមានប្រសាសន៍ថា ៖«ឥឡូវនេះ សត្រូវធំបំផុតរបស់ប្រជាជនគឺការភ័យស្លន់ស្លោ»៕

ប្រែសម្រួល៖ វីរបុត្រ
ប្រភព៖ BBC