ព័ត៌មានអន្ដរជាតិ

ចាំទេប៉ុន្មានឆ្នាំហើយដែល គីម ជុងណាម បងប្រុសលោក គីម ជុងអ៊ុន ត្រូវគេធ្វើឃាតនៅ ម៉ាឡេស៊ី

បានផុស

៤ years មុន

នៅ

ថ្ងៃចន្ទ ១៤ កុម្ភៈ ២០២២

ដោយ

កាលពីថ្ងៃអាទិត្យជាខួបគម្រប់ ៥ ឆ្នាំនៃការសម្លាប់លោក គីម ជុងណាម បងប្រុសរបស់មេដឹកនាំកូរ៉េខាងជើងលោក គីម ជុងអ៊ុន នៅអាកាសយានដ្ឋានអន្តរជាតិគូឡាឡាំពួកាលពីថ្ងៃទី១៣ ខែកុម្ភៈ ឆ្នាំ ២០១៧ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ស្ត្រីជនជាតិឥណ្ឌូនេស៊ីម្នាក់ និងស្ត្រីវៀតណាមម្នាក់ត្រូវបានចោទប្រកាន់ថាបានបាញ់ថ្នាំសរសៃប្រសាទ VX លើមុខលោក គីម ។ ប៉ុន្តែពួកគេមិនមានកំហុសនោះទេ ហើយបាននិយាយថា ពួកគេជឿថា ទង្វើនេះជាផ្នែកមួយនៃការលេងសើចសម្រាប់កម្មវិធីទូរទស្សន៍ប៉ុណ្ណោះ ។

នៅទីបំផុត ព្រះរាជអាជ្ញាបានទម្លាក់សំណុំរឿងរបស់ខ្លួនប្រឆាំងនឹងស្ត្រីឥណ្ឌូនេស៊ី ។ ពួកគេក៏បានទម្លាក់បទចោទឃាតកម្មលើស្ត្រីវៀតណាមនោះផងដែរ ហើយនាងត្រូវបានកាត់ទោសក្រោមបទចោទតិចតួចប៉ុណ្ណោះ គឺការបង្ករបួសស្នាម ហើយក្រោយមកស្ត្រីទាំងនោះត្រូវបានដោះលែងឲ្យត្រឡប់ទៅប្រទេសកំណើតវិញ ។

ចំណែកបុរសកូរ៉េខាងជើង ៤ នាក់ត្រូវបានគេសង្ស័យថាបានណែនាំស្ត្រីទាំងនោះឲ្យធ្វើសកម្មភាព ។ ពួកគេត្រូវបានគេជឿថាបានត្រឡប់ទៅប្រទេសរបស់ពួកគេវិញ បន្ទាប់ពីការវាយប្រហារ ។

សេវាស៊ើបការណ៍សម្ងាត់របស់ប្រទេសកូរ៉េខាងត្បូងជឿថា ឃាតកម្មនេះគឺជាការវាយប្រហារភេរវករដែលរៀបចំដោយលោក គីម ជុងអ៊ុន ដោយនិយាយថា ប៉ូលិសសម្ងាត់របស់កូរ៉េខាងជើងមានជាប់ពាក់ព័ន្ធក្នុងហេតុការណ៍នោះ ។

ក្រោយមកសាកសពលោក គីម ជុងណាម ត្រូវបានប្រគល់ទៅឲ្យកូរ៉េខាងជើងវិញ ខណៈទីក្រុងព្យុងយ៉ាងអះអាងថា មូលហេតុនៃការស្លាប់គឺគាំងបេះដូង ។

ទំនាក់ទំនងរវាងកូរ៉េខាងជើង និងម៉ាឡេស៊ីបានធ្លាក់ចុះ ខណៈដែលកូរ៉េខាងជើងបដិសេធមិនសហការក្នុងការស៊ើបអង្កេត ហើយក្រុងព្យុងយ៉ាងបានផ្តាច់ចំណងការទូតកាលពីឆ្នាំមុន និងបានបិទស្ថានទូតរបស់ខ្លួននៅទីក្រុងគូឡាឡាំពួផងដែរ ។

ទន្ទឹមនោះ អ្នកការទូតកូរ៉េខាងជើងដែលបានចាកចេញពីប្រទេសម៉ាឡេស៊ីត្រូវបានគេជឿថា កំពុងស្នាក់នៅក្នុងស្ថានទូតកូរ៉េខាងជើងក្នុងទីក្រុងប៉េកាំង ខណៈដែលពួកគេមិនអាចត្រឡប់មកប្រទេសរបស់ពួកគេវិញបាន ដោយសារជំងឺរាតត្បាតកូវីដ ១៩ ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ COVAX កាត់បន្ថយចែកចាយវ៉ាក់សាំងកូវីដទៅ កូរ៉េខាងជើង