អ៊ុយក្រែន បញ្ចេញតួលេខថ្មី អំពីទាហានរុស្ស៊ី ដែលខ្លួនសម្លាប់​

នៅថ្ងៃទី២៣នៃការវាយលុករបស់រុស្ស៊ី ក្រសួងការពារជាតិអ៊ុយក្រែនបាននិយាយនៅក្នុងការអាប់ដេតប្រចាំថ្ងៃរបស់ខ្លួនលើ Facebook ថា ទាហានរុស្ស៊ីប្រមាណ ១៤ ២០០ នាក់ត្រូវបានសម្លាប់ចាប់តាំងពីជម្លោះផ្ទុះឡើង។

ទោះបីជាយ៉ាងណាក៏ដោយ ចំនួនពិតប្រាកដគឺមិនស្រួលផ្ទៀងផ្ទាត់ទេ ព្រោះរុស្ស៊ី និងអ៊ុយក្រែន បានអះអាងអំពីតួលេខខុសគ្នាឆ្ងាយណាស់។

នៅក្នុងការអាប់ដេតដ៏កម្រមួយកាលពីថ្ងៃទី៣ខែមីនា រុស្ស៊ីបានអះអាងថា ទាហានរបស់ខ្លួនចំនួន ៤៩៨ នាក់ត្រូវបានសម្លាប់នៅក្នុងការប្រយុទ្ធ ប៉ុន្តែចាប់តាំងពីពេលនោះមក ទីក្រុងមូស្គូ បានរក្សាភាពស្ងៀមស្ងាត់ ដោយមិនបង្ហាញតួលេខថ្មីណាមួយទៀតទេ។

ទន្ទឹមនឹងនេះដែរ មន្ត្រីអាមេរិកបាននិយាយកាលពីថ្ងៃព្រហស្បតិ៍ទី១៧ខែមីនាថា ចំនួនទាហានរុស្ស៊ីដែលស្លាប់ អាចមានលើសពី ៧ ០០០ នាក់ និងរហូតដល់ ១៤ ០០០ នាក់។

ក្រៅពីនេះ អ៊ុយក្រែន ក៏បានអះអាងផងដែរថា ខ្លួនបានបាញ់ទម្លាក់រថក្រោះរុស្ស៊ី ៤៥០គ្រឿង, យន្តហោះ ៩៣ គ្រឿង, ឧទ្ធម្ភាគចក្រ ១១២ គ្រឿង និងបំផ្លាញប្រព័ន្ធប្រឆាំងយន្តហោះចំនួន ៤៣ គ្រឿង៕

ប្រែសម្រួល៖ Vann Vann

ប្រភព៖ BBC

ចុចអាន៖ លោក Zelensky ទើបដឹងថា ខ្លួនក្លាយជាតារា TikTok