ចិន អំពាវនាវឲ្យមានការចរចាដើម្បី បញ្ចប់សង្គ្រាម រុស្ស៊ី-អ៊ុយក្រែន

រដ្ឋមន្ត្រីការបរទេសចិនលោក Wang Yi បាននិយាយទៅកាន់សមភាគីអ៊ុយក្រែនលោក Dmytro Kuleba នៅថ្ងៃអង្គារទី០៥ខែមេសានេះ ដោយប្រទេសចិនបានអំពាវនាវម្តងទៀតឲ្យមានការចរចាដើម្បីបញ្ចប់ជម្លោះនៅប្រទេស អ៊ុយក្រែន។

នេះ គឺជាកិច្ចសន្ទនាលើកដំបូង រវាងរដ្ឋមន្ត្រីការបរទេសទាំងពីរ ចាប់តាំងពីថ្ងៃទី១ ខែមីនាមក នៅពេលលោក Kuleba ស្នើសុំឲ្យទីក្រុងប៉េកាំង ប្រើប្រាស់ទំនាក់ទំនងរបស់ខ្លួនជាមួយទីក្រុងមូស្គូ ដើម្បីបញ្ឈប់ការលុកលុយរបស់រុស្ស៊ី។

លោក Wang បាននិយាយថា “នៅទីបំផុត សង្គ្រាមនឹងបញ្ចប់។ រឿងសំខាន់បំផុតគឺរបៀបឆ្លុះបញ្ចាំងពីការឈឺចាប់ ដើម្បីរក្សាសន្តិសុខយូរអង្វែងនៅក្នុងទ្វីបអឺរ៉ុប និងបង្កើតយន្តការសន្តិសុខអឺរ៉ុប ប្រកបដោយតុល្យភាព ប្រសិទ្ធភាព និងនិរន្តរភាព។ ប្រទេសចិន បានត្រៀមខ្លួនរួចជាស្រេចដើម្បីដើរតួក្នុងន័យស្ថាបនាក្នុងរឿងនេះ ក្នុងគោលដៅមួយ”។

លោក Kuleba បាន​សរសេរ​លើ Twitter ថា ​លោក​ដឹង​គុណ​ចំពោះលោក Wang Yi សម្រាប់សាមគ្គីភាព​ជាមួយ​ជន​ស៊ីវិលដែលរង​គ្រោះ​។

Reuters បានរាយការណ៍ថា ការអំពាវនាវនេះត្រូវបានធ្វើឡើងតាមសំណើរបស់អ៊ុយក្រែន។

គួរបញ្ជាក់ថា ក្នុងនាមជាសម្ព័ន្ធមិត្តជិតស្និទ្ធរបស់ទីក្រុងមូស្គូ, ប្រទេសចិនបានបដិសេធ ថ្កោលទោសសកម្មភាពរបស់រុស្ស៊ីនៅអ៊ុយក្រែន។

ប៉ុន្តែ​នៅ​ពេល​ជាមួយ​គ្នា​នោះ ​រដ្ឋាភិបាល​ក្រុង​ប៉េកាំង​បាន​សម្តែង​ការ​គាំទ្រ​មិន​ងាករេ ​ចំពោះ​អធិបតេយ្យភាព​អ៊ុយក្រែន។ ចិនក៏បានអំពាវនាវឲ្យមានសន្តិភាពផងដែរ និងបាននិយាយថា ខ្លួនត្រៀមរួចជាស្រេចដើម្បីជួយបញ្ចប់សង្រ្គាមតាមរយៈផ្នែកការទូត៕

ប្រែសម្រួល៖ Vann Vann

ប្រភព៖ BBC

ចុចអាន៖ ទង្វើរបស់ប៉ូឡូញជាមួយ អាមេរិក អាចនឹងបង្កឲ្យផ្ទុះសង្គ្រាមត្រជាក់ថ្មី ជាមួយ រុស្ស៊ី