ប្រទេស អាស៊ាន ចំនួន ៣ កត់ត្រាករណីគ្រោះថ្នាក់ចរាចរណ៍ថ្ងៃចូលឆ្នាំថ្មី ស្លាប់សរុប ៣១៥ នាក់

ប្រទេសអាស៊ីអាគ្នេយ៍ (អាស៊ាន) ចំនួន ៣ ក្នុងនោះមាន កម្ពុជា ថៃ និងឡាវបានកត់ត្រាពីករណីគ្រោះថ្នាក់ចរាចរណ៍ជាច្រើន ដោយមានទាំងអ្នកស្លាប់ និងរបួសនៅថ្ងៃបុណ្យសង្ក្រាន្តចូលឆ្នាំថ្មី ដែលទើបតែបញ្ចប់ថ្មីៗនេះ ។

យោងតាមរបាយការណ៍របស់អគ្គស្នងការនគរបាលជាតិនៃព្រះរាជាណាចក្រកម្ពុជាបានបញ្ជាក់ឲ្យដឹងថា ពិធីបុណ្យចូលឆ្នាំប្រពៃណីជាតិខ្មែរ ៣ ថ្ងៃបូកនឹងថ្ងៃអាទិត្យមួយថ្ងៃទៀត ពោលគឺចាប់ពីថ្ងៃទី ១៤​ដល់ថ្ងៃទី ១៧ ខែមេសា ឆ្នាំ២០២២ មានករណីគ្រោះថ្នាក់ចរាចរណ៍នៅទូទាំងប្រទេសចំនួន ៦៥ លើក ហើយបណ្ដាលឲ្យមនុស្សស្លាប់ ៣០ នាក់ និងរងរបួសធ្ងន់ស្រាលចំនួន ១១២ នាក់ ។

ចំណែកយោងតាមតួរលេខផ្លូវការ​នៃ​យុទ្ធនាការ​សុវត្ថិភាព​ចរាចរណ៍​ផ្លូវ​គោក​របស់​រដ្ឋាភិបាលថៃក្នុង​រយៈ​ពេល ៧ ​ថ្ងៃនៃ​ពិធីបុណ្យ​សង្ក្រាន្តបានឲ្យដឹងថា គ្រោះ​ថ្នាក់​ចរាចរណ៍នៅទូទាំងប្រទេស ចាប់ពីថ្ងៃទី១១ ដល់ថ្ងៃទី១៧ ខែមេសា ឆ្នាំ២០២២ បាន​កើត​ឡើង​ចំនួន ១,៩១៧​ លើក ដែល​បាន​ឆក់​យក​ជីវិត​មនុស្ស ២៧៨​ នាក់ និង​របួស ១,៨៦៩ ​នាក់ ។

ដោយឡែកគ្រោះថ្នាក់ចរាចរណ៍នៅទូទាំងប្រទេសឡាវក្នុងអំឡុងពេលបុណ្យចូលឆ្នាំថ្មីរយៈពេល ៣ ថ្ងៃដែលទើបបញ្ចប់កាលពីថ្ងៃទី១៧ ខែមេសា ឆ្នាំ ២០២២ មានចំនួន ១៨១ លើក និងមានអ្នកស្លាប់ចំនួន ៧ នាក់ ហើយអ្នកស្លាប់ភាគច្រើនកើតឡើងក្នុងទីក្រុងវៀងច័ន្ទ ។

គួរបញ្ជាក់ថា ករណីគ្រោះថ្នាក់ចរាចរណ៍ដែលកើតឡើងក្នុងប្រទេសអាស៊ានទាំង ៣ នេះភាគច្រើនគឺការបើកបរក្រោមឥទ្ធិពលគ្រឿងស្រវឹង, បើកបរលើសល្បឿនកំណត់, បើកបរមិនគោរពសិទ្ធិ និងវ៉ាប្រជែងគ្នាជាដើម ៕

ប្រែសម្រួលដោយ ៖ ជីវ័ន្ត

ប្រភព ៖ Bangkok Post / Laotian Times