អាមេរិក សន្យាផ្ដល់ទឹកប្រាក់ ៧០០ លានដុល្លារដល់ អ៊ុយក្រែន និងសមាជិក ណាតូ ផ្សេងទៀតដើម្បីធ្វើសង្គ្រាម (មានវីដេអូ)

ក្រុមមន្ត្រីសហរដ្ឋអាមេរិកក្នុងកិច្ចប្រជុំនៅទីក្រុងកៀវបានសន្យាផ្តល់ហិរញ្ញប្បទានយោធាជាង ៧០០ លានដុល្លារទៀតដើម្បីជួយដល់កិច្ចខិតខំប្រឹងប្រែងធ្វើសង្គ្រាមរបស់អ៊ុយក្រែន ។

ទន្ទឹមនោះប្រហែលពាក់កណ្តាលនៃប្រាក់នេះនឹងទៅអ៊ុយក្រែន ខណៈនៅសល់នឹងត្រូវបែងចែកក្នុងចំណោមសមាជិកណាតូ និងសម្ព័ន្ធមិត្តក្នុងតំបន់ផ្សេងទៀត ។ លើសពីនេះ សហរដ្ឋអាមេរិកក៏នឹងលក់គ្រាប់កាំភ្លើងក្នុងតម្លៃ ១៦៥ លានដុល្លារទៅឲ្យទីក្រុងកៀវផងដែរ ។

ការ​ប្រកាស​នេះ​ត្រូវ​បាន​ធ្វើ​ឡើង ​បន្ទាប់​ពី​​​ដំណើរទស្សនកិច្ច​ដែល​ត្រូវ​បាន​លាក់​បាំង​របស់លោក Antony Blinken រដ្ឋមន្ត្រីការបរទេសអាមេរិក និងលោក Lloyd Austin រដ្ឋមន្ត្រីការពារជាតិ ដោយ​សារ​តែ​ការ​ព្រួយ​បារម្ភ​ផ្នែក​សន្តិសុខ ។

ស្របពេលជាមួយគ្នានេះ វាក៏ជាដំណើរទស្សនកិច្ចកម្រិតខ្ពស់បំផុតរបស់អ្នកការទូតអាមេរិកទាំងនេះទៅកាន់អ៊ុយក្រែនផងដែរ ចាប់តាំងពីការលុកលុយរបស់រុស្ស៊ីបានចាប់ផ្តើម ។

គួរបញ្ជាក់ថា ក្រៅពីជួបជាមួយលោកប្រធានាធិបតី Volodymyr Zelensky, លោក Blinken និងលោក Austin ក៏បានជួបជាមួយរដ្ឋមន្ត្រីការបរទេស Dmytro Kuleba, រដ្ឋមន្ត្រីការពារជាតិ Oleksiy Reznikov និងរដ្ឋមន្ត្រីមហាផ្ទៃ Denys Monastyrsky ផងដែរ ៕

សូមទស្សនាវីដេអូ!

ប្រែសម្រួលដោយ ៖ ជីវ័ន្ត

ប្រភព ៖ BBC

ចុចអាន ៖ លោក Zelensky ចង់ជួបលោក Putin ម្ដងទៀតដើម្បីបញ្ចប់សង្គ្រាម