អង់គ្លេស បញ្ជូនកងទ័ព ៨ពាន់នាក់ទៅអឺរ៉ុបខាងកើត ជាការដាក់ពង្រាយធំបំផុតមួយ ចាប់តាំងពីសង្គ្រាមត្រជាក់

កងទ័ពអង់គ្លេសប្រហែល ៨០០០ នាក់ និងរថក្រោះរាប់សិបគ្រឿង នឹងចូលរួមក្នុងសមយុទ្ធនៅទូទាំងអឺរ៉ុបខាងកើត ដើម្បីប្រយុទ្ធប្រឆាំងនឹងការលុកលុយរបស់រុស្ស៊ី ដែលនេះជាការដាក់ពង្រាយដ៏ធំបំផុតមួយរបស់អង់គ្លេស ចាប់តាំងពីសង្គ្រាមត្រជាក់មក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កងទ័ពណាតូរាប់ម៉ឺននាក់ នឹងចូលរួមជាមួយកងកម្លាំងអង់គ្លេស ដាក់ពង្រាយទៅកាន់ប្រទេសនានាចាប់ពីហ្វាំងឡង់ រហូតដល់ ម៉ាសេដូនីខាងជើងនៅរដូវក្តៅនេះ ក្រោមផែនការដែលត្រូវបានពង្រីកចាប់តាំងពីការវាយលុកនៅអ៊ុយក្រែនមក។ សម្ព័ន្ធកងកម្លាំងបេសកកម្មរួម ដែលរួមមានហ្វាំងឡង់ និងស៊ុយអែត ក៏នឹងចូលរួមផងដែរ។

ក្រសួងការពារជាតិអង់គ្លេសបាននិយាយថា គោលបំណងនៅពីក្រោយសមយុទ្ធនេះ គឺដើម្បីបង្ហាញពីរបៀបដែលកងទ័ពអង់គ្លេស ធ្វើទំនើបកម្មទៅជាកម្លាំងខ្លាំងក្លា រហ័សរហួន និងជាសាកល។

សកម្មភាពនេះត្រូវបានគ្រោងទុកជាយូរណាស់មកហើយ ប៉ុន្តែវាត្រូវបានពង្រឹង ដើម្បីជាការឆ្លើយតប ចាប់តាំងពីរុស្ស៊ីវាយលុកអ្នកជិតខាងរបស់ខ្លួនកាលពីចុងខែកុម្ភៈ។

លោកឧត្តមសេនីយ៍ឯក Ralph Wooddisse មេបញ្ជាការកងទ័ពជើងគោកបានសង្កត់ធ្ងន់អំពីសារសំខាន់នៃសមយុទ្ធនេះ ដោយនិយាយថា “ចក្រភពអង់គ្លេស បានចូលរួមចំណែកយ៉ាងសំខាន់ក្នុងការការពារអឺរ៉ុប និងទប់ស្កាត់ការលុកលុយរបស់រុស្ស៊ី។ សមយុទ្ធជាបន្តបន្ទាប់របស់កងទ័ពអង់គ្លេស គឺជាមូលដ្ឋានសម្រាប់ភាគីទាំងពីរ។ ទំហំនៃការដាក់ពង្រាយ រួមជាមួយនឹងជំនាញវិជ្ជាជីវៈ ការហ្វឹកហ្វឺន និងភាពរហ័សរហួនរបស់កងទ័ពអង់គ្លេស នឹងរារាំងការលុកលុយក្នុងកម្រិតមួយ ដែលគេមិនធ្លាប់ឃើញសោះនៅទ្វីបអឺរ៉ុបក្នុងសតវត្សរ៍នេះ”។

គួរបញ្ជាក់ថា កងទ័ពមកពីកងអនុសេនាធំ Queen’s Royal Hussars បានដាក់ពង្រាយរួចហើយទៅកាន់ប្រទេសហ្វាំងឡង់ ដែលមានព្រំដែនគោក ១៣៣៥ គីឡូម៉ែត្រជាមួយប្រទេសរុស្ស៊ី ដើម្បីចូលរួមក្នុងសមយុទ្ធ Arrow។

ដោយឡែក សមយុទ្ធ Hedgehog នៅខែក្រោយ នឹងមានការចូលរួមពីក្រុមសមរភូមិ Royal Welsh និងកងវរសេនាធំរថក្រោះ។ សមយុទ្ធនេះ គ្រោងធ្វើឡើងនៅព្រំដែន អេស្តូនី-ឡាតវី រួមជាមួយកងទ័ពណាតូប្រមាណ ១៨ ០០០នាក់៕

ប្រែសម្រួល៖ Vann Vann

ប្រភព៖ Daily Mail

ចុចអាន៖ ប្រមុខ UN ព្រលឹងចុងសក់ ដោយមីស៊ីលរុស្ស៊ី ធ្លាក់ជិត ពេលធ្វើទស្សនកិច្ចទីក្រុង កៀវ