ក្រុមហ៊ុន Pfizer អាចប្រឈមបញ្ហាផលិតវ៉ាក់សាំងកូវីដ

រដ្ឋមន្រ្តីក្រសួងសុខាភិបាល និងសេវាកម្មមនុស្សអាមេរិកលោក Alex Azar បាននិយាយនៅក្នុងសេចក្តីប្រកាសព័ត៌មានមួយកាលពីថ្ងៃពុធថា មន្រ្តីសហរដ្ឋអាមេរិកកំពុងធ្វើការជាមួយក្រុមហ៊ុន Pfizer ដើម្បីជួយបង្កើនសមត្ថភាពផលិតកម្មសម្រាប់វ៉ាក់សាំងកូវីដ ១៩ បន្ទាប់ពីក្រុមហ៊ុនផលិតឱសថមួយនេះបានប្រាប់ថា ពួកគេអាចនឹងប្រឈមមុខនឹងបញ្ហាផលិតកម្ម ។

ក្រុមហ៊ុន Pfizer មិនបានឆ្លើយតបភ្លាមៗទៅនឹងសំណើសុំការអត្ថាធិប្បាយនោះទេ ប៉ុន្តែនាយកប្រតិបត្តិរបស់ខ្លួនលោក Albert Bourla បានប្រាប់ CNBC កាលពីដើមសប្តាហ៍នេះថា ក្រុមហ៊ុនកំពុងស្នើសុំរដ្ឋាភិបាលអាមេរិកឲ្យប្រើប្រាស់ច្បាប់ការពារផលិតកម្មដើម្បីកាត់បន្ថយការកម្រិតនៃការផ្គត់ផ្គង់សំខាន់ៗជាពិសេសនៅក្នុងផ្នែកមួយចំនួន ខណៈលោកក៏មិនបានផ្តល់ព័ត៌មានលម្អិតបន្ថែមទៀតអំពីតំបន់ខ្វះខាតនោះផងដែរ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទន្ទឹមនោះក្រុមមន្ត្រីក៏មិនបានបញ្ជាក់ពីបញ្ហាប្រឈមជាក់លាក់នៃការផលិតនេះផងដែរដោយគ្រាន់តែនិយាយថា ពួកគេមានសំភារៈផលិត និងឧបករណ៍ដែលត្រូវការដើម្បីបង្កើតវ៉ាក់សាំងនោះគឺផ្អែកលើការងាររបស់ពួកគេជាមួយក្រុមហ៊ុនផលិតផ្សេងទៀត ។

ចំណែកលោក Ugur Sahin នាយកប្រតិបត្តិនៃក្រុមហ៊ុន BioNTech ដៃគូរបស់ក្រុមហ៊ុន Pfizer បានប្រាប់ Reuters កាលពីសប្តាហ៍មុនថា គោលដៅផលិតកម្មនៃវ៉ាក់សាំងដំបូងរបស់ក្រុមហ៊ុន Pfizer ក្នុងឆ្នាំ ២០២០ ចំនួន ១០០ លានដូសត្រូវបានកាត់បន្ថយពាក់កណ្តាលនៅឆ្នាំនេះដោយសារបញ្ហាផ្គត់ផ្គង់វត្ថុធាតុដើម ។

រីឯលោកវេជ្ជបណ្ឌិត Moncef Slaoui ប្រធានទីប្រឹក្សាអង្គការប្រតិបត្តិការ Operation Warp Speed ​​បាននិយាយថា រដ្ឋាភិបាលសហរដ្ឋអាមេរិកកំពុងពិភាក្សាយ៉ាងសកម្មជាមួយក្រុមហ៊ុន Pfizer ដើម្បីធានានូវវ៉ាក់សាំងចំនួន ១០០ លានដូសបន្ថែមទៀត ។ កាលពីមុនពួកគេបានចុះកិច្ចសន្យាជាមួយក្រុមហ៊ុន Pfizer សម្រាប់ជម្រើសក្នុងការទិញវ៉ាក់សាំងបន្ថែមរហូតដល់ ៥០០ លានដូសក្នុងតម្លៃដែលមិនបានបញ្ជាក់ ។

ក្រុមមន្រ្តីបាននិយាយកាលពីថ្ងៃពុធថា សហរដ្ឋអាមេរិកបានចុះកិច្ចសន្យាសម្រាប់ការចាក់វ៉ាក់សាំងចំនួន ៣០០ លានរួចហើយរវាងវ៉ាក់សាំងរបស់ក្រុមហ៊ុន Pfizer-BioNTech និងមួយទៀតរបស់ក្រុមហ៊ុន Moderna ក្នុងប៉ុន្មានខែខាងមុខនេះ ហើយវ៉ាក់សាំងសរុបចំនួន ៩០០ លានដូសនឹងទទួលបានពីក្រុមហ៊ុនផលិតឱសថដែលកំពុងបង្កើតវ៉ាក់សាំងកូវីដ ១៩ ខណៈដែលវ៉ាក់សាំងរបស់ក្រុមហ៊ុន Moderna ទំនងជាត្រូវបានអនុញ្ញាតឲ្យប្រើប្រាស់នៅថ្ងៃសុក្រ ៕

ប្រែសម្រួលដោយ ៖ ជីវ័ន្ត

ប្រភព ៖ Al Jazeera

ចុចអាន ៖ សហរដ្ឋអាមេរិកប្រកាសអាសន្នមួយទៀតក្រៅពីកូវីដ មនុស្សជាង៦០លាននាក់អាចប៉ះពាល់

ចុចអាន ៖ ប្រពៃណីចម្លែក៖ ឪពុកម្តាយដោះដូរកូនស្រីជាមួយសត្វគោ