ព័ត៌មានអន្ដរជាតិ

លោក Yoon ចូលកាន់តំណែងប្រធានាធិបតីកូរ៉េខាងត្បូងថ្ងៃនេះនឹងប្រឈមបញ្ហាធំពីរ

បានផុស

២ years មុន

នៅ

ថ្ងៃអង្គារ ១០ ឧសភា ២០២២

ដោយ

ប្រធានាធិបតីថ្មីរបស់ប្រទេសកូរ៉េខាងត្បូង គឺ លោក Yoon Suk-yeol ត្រូវបានគេមើលឃើញថា នឹងប្រឈមបញ្ហាសំខាន់ធំ២នៅពេលលោកចូលកាន់តំណែងនាថ្ងៃអង្គារ៍ ទី១០ ខែឧសភា នេះគឺបញ្ហាជាមួយកូរ៉េខាងជើងដែលបានកំពុងធ្វើតេស្តអាវុធថ្មី និងអតិផរណាដែលគំរាមកំហែងដល់សេដ្ឋកិច្ចទើបងើបពីវិបត្តិកូវីដ-១៩។

លោក Yoon អាយុ៦១ឆ្នាំបានឈ្នះក្នុងការបោះឆ្នោតជ្រើសរើសប្រធានាធិបតីកាលពីខែមីនា ក្រោយពេលលោកចូលប្រឡូកក្នុងនយោបាយរបស់គណបក្សអំណាចប្រជាជនអភិរក្សមិនដល់មួយឆ្នាំផង បន្ទាប់ពីធ្វើការជារដ្ឋអាជ្ញាអស់រយៈពេល២៦ឆ្នាំ។ លោកនឹងស្បថចូលកាន់តំណែងនាព្រឹកថ្ងៃអង្គារ៍នេះ នៅខាងមុខវិមានរដ្ឋសភា ក្នុងទីក្រុងសេអ៊ូល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Yoon បានឈ្នះការបោះឆ្នោតតាមរយៈគោលនយោបាយប្រយុទ្ធប្រឆាំងនឹងអំពើពុករលួយ និងបង្កើតវិស័យសេដ្ឋកិច្ចបន្ថែមទៀត ចំពេលសាធារណជនខកចិត្តចំពោះវិសមភាព និងតម្លៃផ្ទះសម្បែង ព្រមទាំងយ៉េនឌ័រ។

កាលពីខែមុន អតិផរណារបស់កូរ៉េខាងត្បូងបានកើនឡើងខ្ពស់បំផុតក្នុងរយៈពេលជាង១៣ឆ្នាំចុងក្រោយនេះ ដោយសារការវាយប្រហាររបស់រុស្ស៊ីលើប្រទេសអ៊ុយក្រែនដែលជំរុញឲ្យហក់ឡើងតម្លៃទំនិញ និងអត្រាការប្រាក់របស់ធនាគារកណ្តាលគំរាមកំហែងដល់ការរំពឹងទុកកំណើនសេដ្ឋកិច្ច។

លោក Yoon អាចស្វែងរកខ្លួនជាចំណុចកណ្តាលនៃចលនាអន្តរជាតិជុំវិញកូរ៉េខាងជើងក្នុងរយៈពេលប៉ុន្មានថ្ងៃខាងមុខនេះ ប្រសិនបើកូរ៉េខាងជើងនឹងបាញ់សាកល្បងអាវុធទៀតក្នុងអាណត្តិ៥ឆ្នាំរបស់ខ្លួន ខណៈមន្ត្រីអាមេរិក និងកូរ៉េខាងត្បូងសង្ស័យថា អាចនឹងមានការបាញ់សាកល្បងទៀត។

កូរ៉េខាងជើងបានដាក់ការសាកល្បងអាវុធជាចំណុចកំពូលនៃរបៀបវារៈរបស់ខ្លួននៅពេលកាលពីខែមីនាបានបាញ់សាកល្បងមីស៊ីលចម្ងាយឆ្ងាយធំបំផុតលើកដំបូងគិតចាប់តាំងពីឆ្នាំ២០១៧មក។

លោក Yoon បានប្តេជ្ញាពង្រឹងសមត្ថភាពរារាំងរបស់សម្ព័ន្ធមិត្តអាមេរិកដ៏រឹងមាំរបស់ខ្លួនដើម្បីទប់ទល់នឹងការគំរាមកំហែងរបស់កូរ៉េខាងជើង ខណៈស្វែងរកការស្តារទំនាក់ទំនងជាមួយប្រទេសចិន។ បញ្ហាទាំងពីរទំនងជានឹងក្លាយជារបៀបវារៈសំខាន់ក្នុងកិច្ចប្រជុំកំពូលលើកដំបូងរបស់លោកជាមួយប្រធានាធិបតីអាមេរិក ចូ បៃដិន ដែលនឹងធ្វើដំណើរទស្សនកិច្ចទៅកូរ៉េខាងត្បូងក្នុងខែនេះ។

ក្នុងពិធីចូលកាន់តំណែងនឹងរៀបចំនៅខាងមុខរដ្ឋសភា ដែលនឹងមានមនុស្សប្រមាណ៤០ ០០០ចូលរួម។ ភ្ញៀវបរទេស៣០០នាក់នឹងចូលរួម ក្នុងនោះមានអនុប្រធានាធិបតីចិន លោក Wang Qishan, រដ្ឋមន្ត្រីការបរទេសជប៉ុន លោក Yoshimasa Hayashi និងលោក Douglas Emhoff ដែលជាស្វាមីរបស់អនុប្រធានាធិបតីអាមេរិក លោកស្រី Kamala Harris ជាដើម៕

ប្រែសម្រួល៖ វីរបុត្រ
ប្រភព៖ Reuters

Related Topics:ប្រទេសកូរ៉េខាងត្បូង