ប្រទេសដំបូងគេលើលោក តម្រូវឲ្យធ្វើចត្តាឡីស័កជាកំហិត ចំពោះអ្នកកើតជំងឺ អុតស្វា (មានវីដេអូ)

បែលហ្ស៊ិក បានក្លាយជាប្រទេសដំបូងគេលើពិភពលោក ដែលតម្រូវឲ្យអនុវត្តការធ្វើចត្តាឡីស័ករយៈពេល២១ ថ្ងៃជាកំហិតចំពោះអ្នកកើតជំងឺអុតស្វា ខណៈប្រទេសចំនួន១៤ បច្ចុប្បន្នបានបញ្ជាក់ពីការផ្ទុះឡើងនៃមេរោគនេះ។

អាជ្ញាធរសុខាភិបាលបែលហ្ស៊ិកនិយាយថា អ្នកដែលឆ្លងវីរុសនេះ នឹងត្រូវដាក់ឲ្យនៅដាច់ដោយឡែករយៈពេលបីសប្តាហ៍ បន្ទាប់ពីករណីចំនួនបី ត្រូវបានកត់ត្រានៅក្នុងប្រទេស។

ការឆ្លង ដែលករណីដំបូងត្រូវបានកត់ត្រាកាលពីថ្ងៃសុក្រទី២០ខែឧសភា សុទ្ធតែមានទំនាក់ទំនងជាមួយពិធីបុណ្យមួយក្នុងទីក្រុងកំពង់ផែ Antwerp។

ជំងឺអុតស្វា ជាធម្មតាកើតនៅតំបន់ត្រូពិចនៃភាគខាងលិច និងកណ្តាលទ្វីបអាហ្រ្វិក ហើយអាចឆ្លងតាមរយៈទំនាក់ទំនងជិតស្និទ្ធជាមួយអ្នកឆ្លង។

ជាធម្មតា​ អុតស្វា មានលក្ខណៈស្រាល ដោយអ្នកជំងឺភាគច្រើនជាសះស្បើយក្នុងរយៈពេលពីរបីសប្តាហ៍ ទោះគ្មានការព្យាបាលក៏ដោយ។

យ៉ាងណាក្តី ជំងឺនេះអាចបង្ហាញថា ក៏មានគ្រោះថ្នាក់ដល់ជីវិតផងដែរ ខណៈការផ្ទុះឡើងនាពេលបច្ចុប្បន្ននេះ បានសម្លាប់អ្នកឆ្លងម្នាក់ក្នុងចំណោម ១០០ នាក់។

គួរបញ្ជាក់ថា ជំងឺដែលត្រូវបានរកឃើញដំបូងនៅក្នុងសត្វស្វាមួយនេះ អាចឆ្លងពីមនុស្សទៅមនុស្សតាមរយៈការទំនាក់ទំនងរាងកាយជិតស្និទ្ធ ក៏ដូចជាការរួមភេទផងដែរ៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ Daily Mail

ចុចអាន៖ WHO បញ្ជាក់ថា ពេលនេះអ្នកកើតជំងឺអុតស្វា កើនដល់ ៨០ករណី ក្នុងប្រទេសចំនួន ១១