អ៊ុយក្រែន ​នឹង​ដាក់​ទណ្ឌកម្ម​ពលរដ្ឋ​ខ្លួន​រូបណា ​ដែល​ទទួល​​លិខិត​ឆ្លង​ដែន ​រុស្ស៊ី

ការព្យាយាមដើម្បីទទួលបានសញ្ជាតិរុស្សី ក្នុងនាមជាជនជាតិអ៊ុយក្រែន អាចក្លាយជាបទល្មើសព្រហ្មទណ្ឌក្នុងពេលឆាប់ៗនេះ។ នេះបើតាមការបញ្ជាក់ពី ឧបនាយករដ្ឋមន្ត្រីអ៊ុយក្រែន និងជារដ្ឋមន្ត្រីក្រសួងធ្វើសមាហរណកម្មដែនដីកាន់កាប់បណ្តោះអាសន្ន លោកស្រី Irina Vereschuk កាលពីថ្ងៃសុក្រទី២២ខែកក្កដា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងការបង្ហោះ Telegram លោកស្រី Vereschuk បាននិយាយថា បញ្ហានេះត្រូវបានពិភាក្សាពីមុន ក្នុងអំឡុងពេលកិច្ចប្រជុំអន្តរនាយកដ្ឋាន។

ឧបនាយករដ្ឋមន្ត្រីរូបនេះនិយាយថា “ការងារលើសេចក្តីព្រាងច្បាប់នៅតែបន្ត។ នឹងមានការពិភាក្សា ប៉ុន្តែទិសដៅត្រូវបានកំណត់”។

ទោះបីជាយ៉ាងណាក៏ដោយ លោកស្រីទទួលស្គាល់ថា អាចមានការពិភាក្សាដ៏វែងឆ្ងាយ និងពិបាក អំពីទិដ្ឋភាពច្បាប់នៃការទទួលបានលិខិតឆ្លងដែនរុស្ស៊ី, អំពីសិទ្ធិមនុស្ស និងតម្រូវការដើម្បីរស់ក្រោមការកាន់កាប់។

លោកស្រី Vereschuk និយាយថា “ប៉ុន្តែសូមកុំភ្លេចឲ្យសោះ។ មានឈាមអ៊ុយក្រែនជាច្រើននៅលើលិខិតឆ្លងដែនរុស្ស៊ីពណ៌ក្រហម។ ឈាមយោធា និងជនស៊ីវិលស្ត្រីនិងកុមារ”។

កាលពីពីរថ្ងៃមុន លោកស្រីបានសរសេរនៅលើ Facebook ថា លិខិតឆ្លងដែន និងការធ្វើប្រជាមតិ កំពុងត្រូវបានប្រើប្រាស់ដោយទីក្រុងមូស្គូ ជា អាវុធដែលមានគ្រោះថ្នាក់ជាងមីស៊ីលទៅទៀត”។

តាមគំនិតរបស់លោកស្រី អាវុធទាំងនេះ អាចឲ្យរុស្ស៊ីបង្កើត “ខែលមនុស្សរស់” របស់ពលរដ្ឋអ៊ុយក្រែននៅក្នុងទឹកដីដែលខ្លួនគ្រប់គ្រង។ ដូច្នេះ ឧបនាយករដ្ឋមន្ត្រី បានអះអាងថា ទីក្រុងកៀវ គួរតែប្រកាន់ជំហរច្បាស់លាស់ និងតឹងរ៉ឹងជាងនេះ លើជនជាតិអ៊ុយក្រែនរូបណា ដែលទទួលបានសញ្ជាតិពី “រដ្ឋលុកលុយ” ហើយបោះឆ្នោតប្រជាមតិ។

គួរបញ្ជាក់ថា កាលពីថ្ងៃទី១១ខែមិថុនា ប្រធានាធិបតីរុស្ស៊ី លោក វ្ល៉ាឌីមៀរ ពូទីន បានចុះហត្ថលេខាលើអនុក្រឹត្យមួយ ដែលផ្តល់សិទ្ធិឲ្យជនជាតិអ៊ុយក្រែនទាំងអស់ ក្នុងការស្នើសុំសញ្ជាតិរុស្ស៊ី តាមនីតិវិធីសាមញ្ញមួយ។

តាមរយៈការធ្វើដូច្នេះ លោកបានពង្រីកនីតិវិធី ដែលពីមុនត្រូវបានបម្រុងទុកសម្រាប់ពលរដ្ឋនៃសាធារណរដ្ឋប្រជាមានិត Donetsk និង Lugansk ក៏ដូចជាអ្នកស្រុក Kherson និងតំបន់ Zaporozhye ដែលស្ថិតនៅក្រោមការគ្រប់គ្រងរបស់កងកម្លាំងរុស្ស៊ីផងដែរ៕

ប្រែសម្រួល៖ Vann Vann

ប្រភព៖ RT

ចុចអាន៖ វិបត្តិស្បៀងអាហារពិភពលោកអាចធូរស្រាល ក្រោយរុស្ស៊ី និងអ៊ុយក្រែន ចុះកិច្ចព្រមព្រៀងនាំចេញគ្រាប់ធញ្ញជាតិ