ព័ត៌មានអន្ដរជាតិ

ខ្លាចកូវីដប្រភេទថ្មី ចិន រៀនតាមអឺរ៉ុប បិទជើងហោះហើរទាំងអស់ពីចក្រភពអង់គ្លេស

បានផុស

៥ years មុន

នៅ

ថ្ងៃព្រហស្បតិ៍ ២៤ ធ្នូ ២០២០

ដោយ

ដូចគ្នាទៅនឹងបណ្តាប្រជាជាតិនៅតំបន់អឺរ៉ុប បានសម្រេចបិទជើងហោះហើរ និងការធ្វើដំណើរគ្រប់រូបភាពពីចក្រភពអង់គ្លេស ដោយសារភ័យខ្លាចជំងឺកូវីដ១៩ ប្រភេទថ្មី ប្រទេសចិន នៅថ្ងៃព្រហស្បត្តិ៍នេះ ក៏សម្រេចបិទជើងហោះហើរ (ចេញ-ចូល) ជាមួយអង់គ្លេស ដូចគ្នា ដោយអះអាង គឺជារឿងចាំបាច់ដើម្បីទប់ស្កាត់វីរុសកូវីដ ១៩ បំប្លែងថ្មីចូលរាតត្បាតក្នុងប្រទេសខ្លួន។

ចាប់តាំងពីរកឃើញការបំប្លែងហ្សែនថ្មីនៃវីរុសកូវីដ ១៩ ក្នុងចក្រភពអង់គ្លេស នាអំឡុងខែកញ្ញាមក វីរុសប្រភេទថ្មីនេះ កំពុងធ្វើឲ្យមានការឆ្លងរាតត្បាតលឿនបំផុតនៅឯទីក្រុងឡុងដ៍ និងតំបន់ភាគខាងត្បូងប្រទេសអង់គ្លេស នាំឲ្យពិភពលោកមានការភ័យខ្លាចជាខ្លាំង ព្រោះវីរុសកូវីដ ១៩ ថ្មីនេះ មានសមត្ថភាពឆ្លងទៅមនុស្សកាន់តែលឿនជាងវីរុសប្រភេទមុន។

ថ្លែងក្នុងសន្និសីទសារព័ត៌មាន លោក Wang Wenbin អ្នកនាំពាក្យក្រសួងការបរទេសចិន បានបញ្ជាក់ថា “ក្រោយការពិចារណាយ៉ាងល្អិតល្អន់ រដ្ឋាភិបាលចិន បានសម្រេចធ្វើតាមបណ្តាប្រទេសផ្សេងទៀត ដោយផ្អាកគ្រប់ជើងហោះហើរពីចក្រភពអង់គ្លេសជាបណ្តោះអាសន្ន”។

ស្ថានភាពពាក់ព័ន្ធនឹងវីរុសកូវីដ ១៩ ប្រភេទថ្មីនេះ កំពុងធ្វើឲ្យអង់គ្លេស និងបារាំងដែលជាប់ព្រំដែនគ្នា រងគ្រោះយ៉ាងខ្លាំងជាមួយកំណើនអ្នកឆ្លងកូវីដ ១៩ យ៉ាងគំហុគដោយគិតត្រឹមព្រឹកថ្ងៃព្រហស្បត្តិ៍នេះ បារាំងមានអ្នកឆ្លងសរុបជាង ២,៥លាននាក់ អង់គ្លេសឆ្លងសរុបជាង ២,១លាននាក់ និងប្រទេសនីមួយៗស្លាប់ជាង ៦ម៉ឺននាក់។

កាលពីថ្ងៃពុធម្សិលមិញ លោក Karine Lacombe ប្រធានផ្នែកជំងឺឆ្លង នៃមន្ទីរពេទ្យ Saint-Antoine ទីក្រុងប៉ារីស បានប្រាកាសឲ្យពលរដ្ឋមានការប្រុងប្រយ័ត្នខ្ពស់ ខណៈស្ថានភាពរាតត្បាតវីរុសប្រភេទថ្មីនេះនៅបារាំង គឺគ្រប់គ្រងលែងបានទៀតហើយ៕

ប្រែសម្រួល៖ សុភា
ប្រភព៖ Reuters

Related Topics: