Bloomberg ៖ រុស្ស៊ី ឈ្នះទីផ្សារថាមពល ទោះរងទណ្ឌកម្មពីលោកខាងលិច អ្នកចាញ់អាចជា អឺរ៉ុប

បើយោងតាមអត្ថបទអធិប្បាយសរសេរដោយអ្នកសារព័ត៌មាន Bloomberg លោក Javier Blas បានឲ្យដឹងថា រុស្ស៊ីកំពុងឈ្នះក្នុងទីផ្សារថាមពល បើទោះជាទទួលរងនូវការដាក់ទណ្ឌកម្មពីសំណាក់លោកខាងលិចក្ដី ហើយសហភាពអឺរ៉ុបទៅវិញទេដែលអាចប្រឈមមុខនឹងវិបត្តិថាមពលនៅរដូវស្លឹកឈើជ្រុះ ។

លោក Blas បាននិយាយថា កាលពីខែកក្កដា ទិន្នផលប្រេងរបស់រុស្ស៊ីបានវិលមករកកម្រិតដូចដើមវិញ មុនពេលប្រតិបត្តិការយោធាពិសេសរបស់ទីក្រុងមូស្គូនៅអ៊ុយក្រែន ពោលរុស្ស៊ីផលិតថាមពលបានជាមធ្យមប្រហែល ១០.៨ លានបារ៉ែលក្នុងមួយថ្ងៃ ។

អត្ថបទរបស់អ្នកសារព័ត៌មានគ្រប់គ្រងផ្នែកថាមពល និងទំនិញបានសរសេរទៀតថា “រុស្ស៊ីបានរកឃើញអតិថិជនថ្មីសម្រាប់ការទិញថាមពលឧស្ម័នរាប់លានបារ៉ែលក្នុងមួយថ្ងៃ បន្ទាប់ពីក្រុមហ៊ុនចម្រាញ់ប្រេងនៅអឺរ៉ុបបានបញ្ឈប់ការទិញ ដោយសារតែការដាក់ទណ្ឌកម្មដោយខ្លួនឯង” ។

លោក​បាន​បន្ត​ថា ប្រេងឆៅ​ភាគ​ច្រើនគឺដឹក​ទៅ​អាស៊ី ពិសេស​ឥណ្ឌា ព្រម​ទាំង​តួកគី និង​កន្លែង​ផ្សេង​ទៀត​នៅ​មជ្ឈិមបូព៌ា ។ ដោយសារប្រេងឆៅម៉ាក Brent កំពុងតែឡើងថ្លៃប្រហែល ១០០ ដុល្លារក្នុងមួយបារ៉ែល ហើយខណៈដែលរុស្ស៊ីអាចផ្តល់ការបញ្ចុះតម្លៃសម្រាប់ការលក់នេះ ចំណូលធំៗបានចូលមកក្នុងវិមានក្រឹមឡាំង ហើយធ្វើឲ្យទណ្ឌកម្មថាមពលប្រឆាំងនឹងទីក្រុងមូស្គូមិនមានប្រសិទ្ធភាពសូម្បីបន្តិច ។

លោក Blas បាននិយាយថា ជោគជ័យនយោបាយរបស់រុស្ស៊ីមានដូចជា ក្នុងខែមីនា និងមេសា អ្នកនយោបាយលោកខាងលិចគិតថា OPEC ដែលដឹកនាំដោយអារ៉ាប៊ីសាអូឌីត និងអារ៉ាប់រួមនឹងផ្តាច់សម្ព័ន្ធភាពរបស់ខ្លួនជាមួយរុស្ស៊ី ប៉ុន្តែវាផ្ទុយស្រឡះទាំងអស់ ។

ជាចុងក្រោយលោក Blas បញ្ជាក់ថា ប្រធានាធិបតីរុស្ស៊ីលោក វ្ល៉ាឌីមៀ ពូទីន អាចលៃលកលើប្រាក់ចំណូលដោយការរឹតបន្តឹងការលក់ឧស្ម័នធម្មជាតិទៅកាន់អឺរ៉ុប ដែលកំពុងតែប្រឈមការកើនឡើងតម្លៃថាមពលលក់រាយយ៉ាងធ្ងន់ធ្ងរ ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ កូរ៉េខាងជើង ផ្ដល់ទាហាន ១០ ម៉ឺននាក់ឲ្យ រុស្ស៊ី ជួយកម្ចាត់ អ៊ុយក្រែន (មានវីដេអូ)