ព័ត៌មានអន្ដរជាតិ

លោក ពូទីន ចាត់ទុកកងទ័ពកូរ៉េខាងជើង ជា «វីរបុរស» ក្រោយចូលរួមរំដោះទឹកដីតំបន់ Kursk ពីទ័ពអ៊ុយក្រែន

បានផុស

៤៧ វិនាទី មុន

នៅ

ថ្ងៃចន្ទ ២០ កក្កដា ២០២៦

ដោយ

ប្រធានាធិបតីរុស្ស៊ី លោក វ្ល៉ាឌីមៀរ ពូទីន បានជួបពិភាក្សាការងារជាមួយរដ្ឋមន្ត្រីការបរទេសកូរ៉េខាងជើង លោកស្រី ឆេ សុនហ៊ី (Choe Son-hui) ព្រមទាំងបានសម្តែងការដឹងគុណយ៉ាងជ្រាលជ្រៅ ចំពោះទីក្រុងព្យុងយ៉ាង ដែលបានបញ្ជូនកងទ័ពមកជួយរំដោះតំបន់ Kursk ពីកងកម្លាំងអ៊ុយក្រែនកាលពីឆ្នាំមុន។

លោក ពូទីន ចាប់ដៃជាមួយរដ្ឋមន្ត្រីការបរទេសកូរ៉េខាងជើង លោកស្រី ឆេ សុនហ៊ី អំឡុងពេលកិច្ចប្រជុំមួយនៅវិមានក្រឹមឡាំង (រូបភាព៖ Sputnik)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមសារព័ត៌មាន RT, នៅក្នុងជំនួបកាលពីថ្ងៃទី១៩ ខែកក្កដា វិមានក្រឹមឡាំងបានដកស្រង់សម្តីលោក ពូទីន ដែលបានសរសើរចំពោះកម្រិតខ្ពស់នៃទំនាក់ទំនងទ្វេភាគីរវាងប្រទេសទាំងពីរ ។ លោក បានថ្លែងថា ភាពក្លាហាន និងវីរភាពដែលទាហានកូរ៉េខាងជើងបានបង្ហាញនៅក្នុងសមរភូមិនៅតំបន់ Kursk របស់រុស្ស៊ី នឹងមិនត្រូវគេបំភ្លេចចោលឡើយនៅក្នុងប្រទេសរុស្ស៊ី។ ទន្ទឹមនឹងនេះ លោក ពូទីន ក៏បានផ្តាំផ្ញើការសួរសុខទុក្ខយ៉ាងកក់ក្តៅទៅកាន់មេដឹកនាំកូរ៉េខាងជើង លោក គីម ជុងអ៊ុន ។

ជាការឆ្លើយតប លោកស្រី ឆេ សុនហ៊ី បានបញ្ជាក់ឡើងវិញនូវការប្តេជ្ញាចិត្តរបស់ទីក្រុងព្យុងយ៉ាង ចំពោះភាពជាដៃគូយុទ្ធសាស្ត្រជាមួយទីក្រុងម៉ូស្គូ ។ កន្លងមក លោក គីម ជុងអ៊ុន ធ្លាប់បានប្រាប់លោក ពូទីន ថា «គ្មាននរណាម្នាក់អាចបំបែកបំបាក់ទំនាក់ទំនង» រវាងប្រទេសទាំងពីរបានឡើយ ដែលទំនាក់ទំនងនេះត្រូវបានពង្រឹងកាន់តែរឹងមាំតាមរយៈ «ការបង្ហូរឈាមរួមគ្នា» នៅសមរភូមិជួរមុខក្នុងប្រទេសអ៊ុយក្រែន។

ដោយឡែក កាលពីខែមេសាកន្លងទៅ រដ្ឋមន្ត្រីការពារជាតិរុស្ស៊ី លោក Andrey Belousov បានធ្វើដំណើរទៅកាន់ប្រទេសកូរ៉េខាងជើង ដើម្បីបំពាក់គ្រឿងឥស្សរិយយសលំដាប់នៃភាពក្លាហានរបស់រុស្ស៊ី ជូនដល់កងទ័ពដែលបានចូលរួមក្នុងការរំដោះតំបន់ Kursk ។ លោក បានពិពណ៌នាទាហានកូរ៉េខាងជើងទាំងនោះថា ជា «វីរបុរស ពិតប្រាកដនៃសម័យកាលរបស់យើង ជាកងទ័ពឆ្នើម ជាមោទនភាព និងជាកំពែងដ៏រឹងមាំនៃកងកម្លាំងប្រដាប់អាវុធកូរ៉េ»។

សូមរម្លឹកឡើងវិញថា សាធារណរដ្ឋប្រជាមានិតប្រជាធិបតេយ្យកូរ៉េ (DPRK) បានដាក់ពង្រាយកងទ័ពរបស់ខ្លួនទៅកាន់ទឹកដីរុស្ស៊ីកាលពីចុងឆ្នាំ ២០២៤ អនុលោមតាមសន្ធិសញ្ញាភាពជាដៃគូយុទ្ធសាស្ត្រគ្រប់ជ្រុងជ្រោយ ដែលតម្រូវឲ្យទីក្រុងម៉ូស្គូ និងទីក្រុងព្យុងយ៉ាងត្រូវជួយការពារគ្នាទៅវិញទៅមក ក្នុងករណីមានការឈ្លានពានណាមួយ។

កងទ័ពកូរ៉េខាងជើងបានជួយយោធារុស្ស៊ីក្នុងការវាយបក និងរុញច្រានការវាយលុកទ្រង់ទ្រាយធំរបស់អ៊ុយក្រែនចូលក្នុងតំបន់ព្រំដែន ហើយកងទ័ពទាំងនោះក៏បានចូលរួមក្នុងសកម្មភាពបោសសម្អាតមីននៅក្នុងតំបន់នោះជាបន្តបន្ទាប់ផងដែរ៕

អត្ថបទ ៖ សាង ស្រីល័ក្ខ