កូនកំលោះជនជាតិចិន ត្រូវរន្ទះបាញ់ស្លាប់ ពេលកំពុងថត Pre-Wedding

អនាគតកូនកំលោះម្នាក់បានស្លាប់ដោយសាររន្ទះបាញ់ ខណៈកំពុងថតរូប Pre-Wedding ជាមួយគូដណ្តឹង អំឡុងពេលមានភ្លៀងផ្គររន្ទះ នៅតំបន់ទេសចរណ៍ដ៏ពេញនិយមមួយនាភាគនិរតីនៃប្រទេសចិន។

យោងតាមសេចក្តីថ្លែងការណ៍របស់គណៈកម្មាធិការគ្រប់គ្រងភ្នំ Jade Dragon Snow Mountain ក្នុងទីក្រុង Lijiang ខេត្ត Yunnan បុរសនោះមានឈ្មោះហៅក្រៅ Ruan ​ត្រូវរន្ទះបាញ់ បន្ទាប់ពីម៉ោង ១:៣០ រសៀល កាលពីថ្ងៃពុធ។

ក្រោយជូបឧបទ្ទវហេតុភ្លាមៗ ឡានសង្គ្រោះបន្ទាន់ក្នុងតំបន់បានទៅដល់កន្លែងកើតហេតុ ហើយបាននាំជនរងគ្រោះទៅកាន់មន្ទីរពេទ្យ ប៉ុន្តែជាអកុសលបុរសនោះបានស្លាប់ពេលបញ្ជូនដល់មន្ទីរពេទ្យ។

តាមពិតទៅ ​មុនកើតឧបទ្ទវហេតុ អាជ្ញាធរ​ឧតុនិយម​ក្នុង​តំបន់​បាន​ចេញ​សេចក្ដី​ប្រកាស​អាសន្នអំពី​ផ្គរ រន្ទះ និង​ផ្លេកបន្ទោរ​រួចហើយ ប៉ុន្តែជនរងគ្រោះ និងអនាគតកូនក្រមុំ រួមទាំងក្រុមការងារថត មិនបានបានចាប់អារម្មណ៍ ទើបបង្ករឿងសោកនាដកម្មនេះឡើង។ ​យ៉ាងណាមិញ ចំពោះមនុស្សដទៃទៀតដែលនៅកន្លែងកើតហេតុ ​ពុំមានគ្រោះថ្នាក់អ្វីនោះទេ៕

ប្រែសម្រួល៖ សន្យា

ប្រភព៖ SCMP