អតីតមេដឹកនាំក្រុមអាវក្រហម ឲ្យតាមដានតុលាការធម្មនុញ្ញលើការសម្រេច​តំណែង ៨ ឆ្នាំរបស់លោក ប្រាយុទ្ធ

លោក Jatuporn Promphan អតីតមេដឹកនាំក្រុមអាវក្រហមបានដឹកនាំបក្ខពួករៀបចំព្រឹត្តិការណ៍មួយដើម្បីបញ្ឈប់អំណាចរបស់បងប្អូនទាំង ៣ នាក់របស់លោក ប្រាយុទ្ធ ចាន់អូចា ជាពិសេសស្នើឲ្យតាមដានការសម្រេចរបស់តុលាការធម្មនុញ្ញលើករណី ៨ ឆ្នាំនៃការកាន់តំណែងជានាយករដ្ឋមន្ត្រីរបស់លោក ប្រាយុទ្ធ តែម្ដង ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងព្រឹត្តិការណ៍នៅបរិវេណផ្លូវបំបែក Ratchaprasong លោក Jatuporn Promphan បាននិយាយថា មនុស្សជាច្រើនពិតជាឆ្ងល់ហើយ ហេតុអ្វីបានជាលោកនាំគ្នាមកតវ៉ានៅផ្លូវនេះ ពីព្រោះកន្លែងនេះ គឺជាទីកន្លែងនិមិត្តរូបខាងយោបាយ ។

លោក Jatuporn បន្តថា នៅថ្ងៃទី ៦-៧ ខែកញ្ញានេះ ពួកគេនឹងស្នើឲ្យមានការធ្វើវិសោធនកម្មមាត្រា ២៧២ នៃរដ្ឋធម្មនុញ្ញ ឆ្នាំ២០១៧ ដែលផ្តល់សិទ្ធិឲ្យសមាជិកព្រឹទ្ធសភាមានអំណាចក្នុងការបោះឆ្នោតជ្រើសរើសនាយករដ្ឋមន្ត្រី ពីព្រោះ​រដ្ឋធម្មនុញ្ញ​មាត្រា ២៧២ នេះសរសេរឡើង​ដើម្បី​ហែក​រដ្ឋធម្មនុញ្ញ ពោលគឺមិន​មែនធ្វើ​វិសោធនកម្មនោះទេ ។

អតីតមេដឹកនាំក្រុមអាវក្រហមរូបនេះបញ្ជាក់ថា ពួក​ខ្លួន​នឹងលាតត្រដាង​ពី​ការ​ខូច​ខាតដល់ប្រទេសជាតិ​ក្នុង​រយៈ​ពេល ៨ ឆ្នាំក្រោម​ការ​កាន់​អំណាច​របស់បងប្អូនទាំង ៣ នាក់នេះ ហើយពួកគេ​នឹង​មិនត្រូវការបងប្អូនទាំង ៣ នាក់ ឬអ្នក​ទី ​៤ ដែលមានលក្ខណៈបែបនេះនោះទេ ពីព្រោះ​អ្នកទាំងនោះសុទ្ធតែ​បង្ក​ការ​ខូចខាតដល់ប្រទេសជាតិ និងបង្កការបែងបាក់ក្នុងសង្គម ។

គួរបញ្ជាក់ថា តុលាការធម្មនុញ្ញថៃនឹងកោះប្រជុំពិសេសនៅថ្ងៃទី៨ ខែកញ្ញា ឆ្នាំ២០២២ ដើម្បីពិចារណាលើអាណត្តិរយៈពេល ៨ ឆ្នាំនៃការកាន់តំណែងជានាយករដ្ឋមន្ត្រីរបស់លោក ប្រាយុទ្ធ ចាន់អូចា ខណៈពីដើមឡើយ តុលាការបានកំណត់ថា នឹងកោះប្រជុំនៅ​ថ្ងៃ​ទី​១៤ ខែ​កញ្ញា ឆ្នាំ២០២២ ៕

ប្រែសម្រួលដោយ ៖ គង់ សំអាន

ប្រភព ៖ Naewna

ចុចអាន ៖ វត្តនៅខេត្តភាគខាងត្បូង វៀតណាម បើកបង្រៀនភាសាខ្មែរ ឥតគិតថ្លៃ