ពលរដ្ឋនៅជាយក្រុង ហាណូយ រើរបស់របរទៅទីទួលសុវត្ថិភាពទាំងយប់ ដោយសារទឹកជំនន់

អាជ្ញាធរក្នុងតំបន់បានរាយការណ៍ថា ប្រជាជនជាច្រើននៅក្នុងភូមិមួយនៅជាយក្រុងហាណូយបានរើរបស់របររបស់ពួកគេទៅកាន់ទីទួលសុវត្ថិភាពទាំងយប់ ដោយសារកម្រិតទឹកទន្លេ Bui បានហក់ឡើងខ្លាំង ចាប់តាំងពីរសៀលថ្ងៃព្រហស្បតិ៍មកម្ល៉េះ ដោយបណ្ដាលឲ្យលិចផ្លូវ និងផ្ទះសម្បែងជាច្រើនខ្នង ។

លោក Nguyen Manh Ha ប្រធានរដ្ឋបាលតំបន់ Xuan Mai របស់ទីក្រុងហាណូយបានប្រាប់សារព័ត៌មាន Tuoi Tre កាលពីថ្ងៃសុក្រថា បន្ទាប់ពីមានភ្លៀងធ្លាក់ខ្លាំង ទឹកទន្លេបានហូរចូលលិចភូមិ Bui Xa ក្នុងតំបន់ Xuan Mai ខណៈតំបន់ខ្លះលិចក្នុងជម្រៅ ៥០ សង់ទីម៉ែត្រ ។

លោក Ha បាននិយាយថា នៅពេលដែលទឹកជំនន់បានចាប់ផ្តើមវាយលុកផ្ទះនៅតំបន់ទំនាបមួយចំនួននៅក្នុងភូមិត Bui Xa និងតំបន់ផ្សេងទៀត អាជ្ញាធរក្រុងបានចេញការព្រមានអំពីទឹកជំនន់ និងរៀបចំសម្រាប់ការជម្លៀសប្រជាជននៅពេលចាំបាច់ ។

លោក Ha បានបន្ថែមថា ភ្លៀងបានបន្តធ្លាក់យ៉ាងខ្លាំងកាលពីល្ងាចថ្ងៃព្រហស្បតិ៍ដែលជំរុញឲ្យអាជ្ញាធរមូលដ្ឋានផ្តល់ការព្រមានអំពីទឹកជំនន់ខ្លាំងក្លា និងការណែនាំអំពីសុវត្ថិភាពដល់ប្រជាពលរដ្ឋតាមរយៈប្រព័ន្ធបំពងសំឡេង ខណៈគិតត្រឹមថ្ងៃព្រហស្បតិ៍ រដ្ឋបាលមូលដ្ឋានបានជម្លៀសប្រជាពលរដ្ឋចំនួន ១៤ គ្រួសារហើយ” ។

ទោះយ៉ាងណាលោក Ha បានប្រាប់ Tuoi Tre ថា ទឹកជន់លិចក៏បានស្រកបន្តិចម្តងៗផងដែរ ចាប់តាំងពីព្រឹកថ្ងៃសុក្រ ប៉ុន្តែអាជ្ញាធរ និងអ្នកស្រុកនៅតែរក្សាការប្រុងប្រយ័ត្នខ្ពស់ ដើម្បីដោះស្រាយការវិវឌ្ឍន៍អវិជ្ជមានដែលអាចកើតមានក្នុងពេលខាងមុខ ៕

ប្រែសម្រួលដោយ ៖ ជីវ័ន្ត

ប្រភព ៖ Tuoi Tre

ចុចអាន ៖ ការសិក្សាថ្មី ៖ ផែនដីកំពុងស្ថិតក្នុងហានិភ័យ ៤ ចំណុច អាចជាមហន្តរាយ​សម្រាប់មនុស្សជុំវិញពិភពលោក