ចរាចរណ៍នៅព្រំដែនប្រទេសជាប់ រុស្ស៊ី កកស្ទះខ្លាំង ក្រោយលោក ពូទីន ប្រកាសកែនទ័ព

ឆ្មាំព្រំដែនរបស់ហ្វាំងឡង់បានប្រាប់សារព័ត៌មាន Reuters ថា ចរាចរណ៍ចូលទៅក្នុងប្រទេសហ្វាំងឡង់ឆ្លងកាត់ព្រំដែនភាគអាគ្នេយ៍របស់ខ្លួនជាមួយរុស្ស៊ីកំពុងមានភាពមមាញឹក បន្ទាប់ពីជនជាតិរុស្ស៊ីជាច្រើននាក់បានសម្រុកចាកចេញពីប្រទេស ។

ចំនួនពលរដ្ឋរុស្ស៊ីដែលចូលមកប្រទេសហ្វាំងឡង់បានកើនឡើងច្រើនជាងទ្វេដងកាលពីថ្ងៃព្រហស្បតិ៍ បើធៀបនឹងសប្តាហ៍មុន ក្រោយពីបញ្ជារបស់លោកប្រធានាធិបតី វ្ល៉ាឌីមៀរ ពូទីន សម្រាប់ការកែនទ័ពមួយផ្នែកនៅក្នុងប្រទេស ។

អ្នក​នាំ​ពាក្យឆ្មាំ​ព្រំដែន​បាន​និយាយ​ថា “ចរាចរណ៍ចូលមកកាន់ព្រំដែនភាគអាគ្នេយ៍របស់ហ្វាំងឡង់ពីសំណាក់ពលរដ្ឋរុស្ស៊ីមានភាពមមាញឹក និងកកស្ទះខ្លាំងនៅពេលព្រឹក ហើយអាចនឹងកើនឡើងនៅថ្ងៃបន្តបន្ទាប់ទៀត” ។

អ្នក​នាំ​ពាក្យ​រូប​នេះ​បាន​និយាយ​ថា រថយន្តជាច្រើនគ្រឿងបានឈប់បន្តកន្ទុយគ្នាក្នុងចម្ងាយប្រហែល ៥០០ ម៉ែត្រនៅផ្លូវកាត់ក្រុង Vaalimaa និងនៅច្រកឆ្លងកាត់ខេត្ត Nuijamaa ។

គួរបញ្ជាក់ថា ពលរដ្ឋរុស្ស៊ីបានសម្រុកចេញពីប្រទេស បន្ទាប់ពីប្រធានាធិបតីលោក វ្ល៉ាឌីមៀរ ពូទីន កាលពីថ្ងៃពុធបានប្រកាសពីការកែនទ័ពមួយផ្នែកនៅក្នុងប្រទេស ដែលនឹងប៉ះពាល់ដល់មនុស្សប្រហែល ៣០០,០០០ នាក់ដែលមានអាយុចន្លោះពី ១៨ ទៅ ៥០ ឆ្នាំ ៕

ប្រែសម្រួលដោយ ៖ ជីវ័ន្ត

ប្រភព ៖ Al Jazeera

ចុចអាន ៖ រុស្ស៊ី បញ្ជាក់ហេតុផលពីក្រោយការប្រកាសកែនទ័ពនៅក្នុងប្រទេស