រុស្ស៊ី​ មិន​ចង់​មាន​ជម្លោះ​បើកចំហ​ជាមួយ ​អាមេរិក និង​ណាតូ ទេ

អនុរដ្ឋមន្ត្រីការបរទេសរុស្ស៊ីលោក Sergey Ryabkov បានសង្កត់ធ្ងន់កាលពីថ្ងៃសុក្រទី២៣ខែកញ្ញានៅក្នុងសន្និសីទមួយថា ទីក្រុងមូស្គូ គ្មានចំណាប់អារម្មណ៍ចំពោះជម្លោះបើកចំហ ជាមួយសហរដ្ឋអាមេរិក ឬអង្គការសន្ធិសញ្ញាអាត្លង់ទិកខាងជើង (NATO) នោះទេ។

លោក Ryabkov បានសម្តែងការព្រួយបារម្ភ អំពីទំនាក់ទំនងបច្ចុប្បន្នរបស់រុស្ស៊ីជាមួយភាគីទាំងពីរនេះ ដោយបញ្ជាក់ថា “ទំនាក់ទំនងគឺធ្លាក់ជិតដល់ចំណុចសូន្យហើយ។ អាមេរិកមិនចង់ចរចាជាគោលការណ៍ទេ ហើយរួមជាមួយនឹងសមាជិកមួយចំនួនរបស់ណាតូ, អ្នកទាំងនោះកំពុងជំរុញដោយផ្ទាល់ឲ្យទីក្រុងកៀវ បង្វែរប្រតិបត្តិការយោធាមកកាន់ទឹកដីរបស់យើង ក្នុងគោលបំណងប្រយុទ្ធដល់អ៊ុយក្រែនចុងក្រោយ”។

លោកបានគូសបញ្ជាក់បន្ថែមទៀតថា ទីក្រុងមូស្គូ មិនបានគំរាមកំហែងនរណាម្នាក់ជាមួយនឹងការវាយប្រហារនុយក្លេអ៊ែរនោះទេ ប៉ុន្តែគ្រាន់ជាការព្រមានអំពីហានិភ័យនៃការជ្រៀតជ្រែក ក្នុងប្រតិបត្តិការយោធារបស់ខ្លួននៅអ៊ុយក្រែនប៉ុណ្ណោះ។ លោក Ryabkov និយាយថា សហរដ្ឋអាមេរិកមានចេតនា បង្កើតការគំរាមកំហែងដល់សន្តិសុខជាតិរបស់រុស្ស៊ី៕

ប្រែសម្រួល៖ Vann Vann

ប្រភព៖ Tele Trader

ចុចអាន៖ អ៊ុយក្រែន បណ្ដេញ ឯកអគ្គរដ្ឋទូត អ៊ីរ៉ង់