អឺរ៉ុប នឹងជួបរដូវរងាត្រជាក់បំផុត ដោយសារតែវិបត្តិថាមពល

លោកស្រី Kadri Simson ស្នងការអឺរ៉ុបទទួលបន្ទុកថាមពលបានប្រាប់អ្នកសារព័ត៌មានកាលពីពេលថ្មីៗនេះថា មន្ត្រីថាមពលសហភាពអឺរ៉ុបកំពុងមានការព្រួយបារម្ភអំពីផលប៉ះពាល់នៃវិបត្តិថាមពលដែលកំពុងបន្តនៅក្នុងទ្វីបអឺរ៉ុប ជាពិសេសនឹងជួបអាកាសធាតុត្រជាក់ខ្លាំងបំផុត នៅពេលរដូវរងាចូលមកដល់ ។

លោកស្រី Simson បាននិយាយនៅក្នុងសន្និសីទសារព័ត៌មានមួយ បន្ទាប់ពីកិច្ចប្រជុំវិសាមញ្ញរបស់រដ្ឋមន្ត្រីថាមពលសហភាពអឺរ៉ុបថា “ក្រុមមន្ត្រីកំពុងមានការព្រួយបារម្ភ ព្រោះថា រដូវរងាឆ្នាំនេះនឹងមិនមែនជារដូវរងាដ៏ងាយស្រួលសម្រាប់យើងនោះទេ ហើយរដូវរងាបន្ទាប់នឹងកាន់តែលំបាកថែមទៀត” ។

កិច្ចប្រជុំនេះមានគោលបំណងដើម្បីដោះស្រាយតម្លៃឧស្ម័នដែលហក់ឡើងខ្លាំងនៅអឺរ៉ុប និងដើម្បីបង្កើតកញ្ចប់វិធានការសង្គ្រោះបន្ទាន់ដែលមានគោលបំណងជួយដល់គ្រួសារ និងអាជីវកម្មអឺរ៉ុប ចំពេលមានវិបត្តិ ។

ទន្ទឹមនោះ ផែនការនេះក៏កំណត់ការសន្សំថាមពលជាកាតព្វកិច្ច ដោយតម្រូវឲ្យសមាជិកសហភាពអឺរ៉ុបកាត់បន្ថយតម្រូវការថាមពលខ្ពស់បំផុតចំនួន ៥ ភាគរយ និងស្នើឲ្យកាត់បន្ថយការប្រើប្រាស់អគ្គិសនី ១០ ភាគរយផងដែរ ប៉ុន្តែទោះជាយ៉ាងណាក៏ដោយ រដ្ឋមន្ត្រីទាំង ១៥ បានបដិសេធមិនយល់ព្រមលើការកំណត់តម្លៃឧស្ម័នធម្មជាតិនេះនោះទេ ។

យោងតាមក្រុមហ៊ុន Gazprom បានឲ្យដឹងថា ដោយសារការចែកចាយឧស្ម័នរបស់រុស្ស៊ីទៅកាន់សហភាពអឺរ៉ុបបានធ្លាក់ចុះដល់ទៅ ៤៨ ភាគរយនៅឆ្នាំនេះ ធ្វើឲ្យអតិផរណានៅក្នុងតំបន់អឺរ៉ុបក៏បានឈានដល់តួលេខ ២ ខ្ទង់ជាលើកដំបូងផងដែរក្នុងប្រវត្តិសាស្ត្រថ្មីៗនេះ ។

ស្របពេលជាមួយគ្នានេះ មានការភ័យខ្លាចថា ស្ថានការណ៍នឹងកាន់តែយ៉ាប់យ៉ឺនបន្ថែមទៀត បន្ទាប់ពីបំពង់បង្ហូរឧស្ម័ន Nord Stream របស់រុស្ស៊ីបានរងការខូចខាតនៅក្នុងសកម្មភាពដែលគេសង្ស័យថាមានការបំផ្លិចបំផ្លាញពីក្រុមភេរវកម្ម ជាពិសេសវានឹងប៉ះពាល់យ៉ាងធ្ងន់ធ្ងរដល់ការចែកចាយឧស្ម័នដល់ប្លុកអឺរ៉ុបនាពេលអនាគតដ៏ខ្លីខាងមុខនេះ ៕

ប្រែសម្រួលដោយ ៖ ជីវ័ន្ត

ប្រភព ៖ RT

ចុចអាន ៖ លោក Zelensky ឲ្យប្រជាជននៅតំបន់មួយរបស់ រុស្ស៊ី ប្រយុទ្ធដើម្បីបញ្ចៀស​ការស្លាប់