លោក Zelensky ឲ្យប្រជាជននៅតំបន់មួយរបស់ រុស្ស៊ី ប្រយុទ្ធដើម្បីបញ្ចៀស​ការស្លាប់

ប្រធានាធិបតីអ៊ុយក្រែនលោក Volodymyr Zelensky បានអំពាវនាវកាលពីពេលថ្មីៗនេះដល់ប្រជាជនដែលរស់នៅក្នុងតំបន់ Caucasus របស់រុស្ស៊ីឲ្យ “តស៊ូប្រយុទ្ធដើម្បីបញ្ចៀសការស្លាប់” និងការពារសេរីភាពរបស់ពួកគេ ក្រោយសង្រ្គាមរុស្ស៊ី-អ៊ុយក្រែននៅតែកំពុងបន្ត ។

លោក Zelensky បាននិយាយនៅក្នុងសេចក្តីថ្លែងការណ៍មួយថា “អស់រយៈពេល ២២០ ថ្ងៃហើយដែលយើងបានការពារខ្លួនប្រឆាំងនឹងអ្នកដែលបាញ់កាំជ្រួចមីស៊ីលមកលើយើង ហើយនេះគឺជាសង្រ្គាមដ៏អាក្រក់ និងជាឧក្រិដ្ឋកម្មមួយនៅលើផ្នែកនៃទឹកដីរបស់រុស្ស៊ី” ។

លោកប្រធានាធិបតីបញ្ជាក់ថា “យើងបានធ្វើអ្វីគ្រប់យ៉ាងដើម្បីការពារប្រជាជនរបស់យើង និងឯករាជ្យភាពរបស់អ៊ុយក្រែន ហើយនេះគឺជាកាតព្វកិច្ចដ៏ពិសិដ្ឋរបស់យើង ជាកាតព្វកិច្ចក្នុងនាមជាឪពុកម្តាយ ជាកូន ក៏ដូចជាកាតព្វកិច្ចរបស់ប្រជាជនយើងគ្រប់ជំនាន់ដែលបានរស់នៅលើទឹកដីមួយនេះ” ។

ដោយអំពាវនាវដល់ប្រជាជននៃតំបន់ Caucasus និងមនុស្សគ្រប់គ្នាដែលរស់នៅក្នុងទឹកដីនៃប្រទេសរុស្ស៊ី, លោក Zelenskyy បាននិយាយថា “គ្មានហេតុផលអ្វីដែលអ្នកនៅតែស្ថិតក្នុងចំណោមមនុស្សជាច្រើនដែលបម្រើមេដឹកនាំដែលចង់បានសង្រ្គាមនោះទេ ពោលអ្នកមិនមានកាតព្វកិច្ចបែបនេះទេ ដូច្នេះសូមតស៊ូប្រយុទ្ធដើម្បីបញ្ចៀសការស្លាប់ ដោយសារសង្គ្រាម” ។

គួរបញ្ជាក់ថា ការអំពាវនាវរបស់លោក Zelensky បានកើតឡើង បន្ទាប់ពីប្រធានាធិបតីរុស្ស៊ីលោក វ្ល៉ាឌីមៀរ ពូទីន បានចុះហត្ថលេខាលើក្រឹត្យចំនួន ៤ ទទួលស្គាល់អតីតតំបន់អ៊ុយក្រែនដូចជា Donetsk, Kherson, Luhansk និង Zaporizhzhia ជារដ្ឋអធិបតេយ្យភាពឯករាជ្យ ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ អឺរ៉ុប នឹងជួបរដូវរងាត្រជាក់បំផុត ដោយសារតែវិបត្តិថាមពល