មកដឹងទំហំទឹកប្រាក់ដែល រុស្ស៊ី ចំណាយបាញ់មីស៊ីលលើទីក្រុង អ៊ុយក្រែន

បើយោងតាមការប៉ាន់ស្មានរបស់ទស្សនាវដ្ដី Forbes បានឲ្យដឹងថា ការបាញ់មីស៊ីលផ្លោងយ៉ាងសន្ធាប់របស់រុស្ស៊ីលើទីក្រុងនានារបស់អ៊ុយក្រែនកាលពីពេលថ្មីៗនេះធ្វើឲ្យទីក្រុងមូស្គូខាតបង់ប្រាក់ចន្លោះពី ៤០០ ទៅ ៧០០ លានដុល្លារ ។

កាលពីថ្ងៃចន្ទ ទីក្រុងមូស្គូបានបាញ់រ៉ុក្កែតរាប់សិបគ្រាប់ទៅលើទីក្រុងធំៗរបស់អ៊ុយក្រែន រួមទាំងទីក្រុងកៀវផងដែរនោះ បណ្ដាលឲ្យមនុស្សចំនួន ១៩ នាក់បានស្លាប់ និង ១០៥ នាក់ទៀតរងរបួស ។

ដោយឡែកសារព័ត៌មាន Sky News បានចុះផ្សាយថា ចំពោះការវាយប្រហារនេះ រុស្ស៊ីបានប្រើប្រាស់កាំជ្រួចមីស៊ីលចំនួន ៨៤ គ្រាប់ និងយន្តហោះគ្មានមនុស្សបើក (ដ្រូន) ចំនួន ២៤ គ្រឿង ខណៈមីស៊ីលទាំងនោះមានដូចជា មីស៊ីល Kh-101, មីស៊ីល Kh-555, មីស៊ីល Kalibr, មីស៊ីល Iskander, មីស៊ីល S-300 និងមីស៊ីល Tornado-S ដែលសុទ្ធតែមានតម្លៃថ្លៃ ។

ទន្ទឹមនោះ ការវាយប្រហារនេះបានកើតឡើងតែរយៈពេលប៉ុន្មានថ្ងៃប៉ុណ្ណោះ បន្ទាប់ពីការផ្ទុះគ្រាប់បែកបានបំផ្លាញស្ពានយុទ្ធសាស្ត្រគ្រីមៀ ដែលទីក្រុងមូស្គូហៅថា ជាការវាយប្រហារភេរវកម្មរបស់អ៊ុយក្រែន ។

គួរបញ្ជាក់ថា នេះជាលើកទីមួយហើយដែលទីក្រុងកៀវរងការវាយប្រហារ បន្ទាប់ពីស្ងប់ស្ងាត់អស់រយៈពេលជាច្រើនខែ ក្រោយផ្ទុះសង្គ្រាមលុកលុយរបស់រុស្ស៊ីលើអ៊ុយក្រែនកាលពីថ្ងៃទី ២៤ ខែកុម្ភៈ ៕

ប្រែសម្រួលដោយ ៖ ជីវ័ន្ត

ប្រភព ៖ Sky News

ចុចអាន ៖ មកដឹងចំនួនមីស៊ីលដែល រុស្ស៊ី បាញ់យ៉ាងសន្ធាប់លើទីក្រុង អ៊ុយក្រែន