រុស្ស៊ី ឲ្យ អ៊ុយក្រែន ផ្ដាច់ខ្លួនចេញពីណាតូ និងលោកខាងលិច ទើបក្លាយជា​រដ្ឋាភិបាលមិត្តភាព

លោក Sergey Surovikin អគ្គមេបញ្ជាការកងទ័ពរុស្ស៊ីបាននិយាយថា ជនជាតិរុស្ស៊ី និងអ៊ុយក្រែន ជាប្រជាជនតែមួយ ហើយទីក្រុងមូស្គូចង់បានរឿងតែមួយគត់ គឺឲ្យអ៊ុយក្រែនផ្ដាច់ខ្លួនចេញពីអង្គការណាតូ និងលោកខាងលិច ដូច្នេះទើបប្រទេសទាំងពីរអាចក្លាយជារដ្ឋាភិបាលមិត្តភាព ។

លោក Surovikin ដែលត្រូវបានតែងតាំងជាមេបញ្ជាការកងកម្លាំងរុស្ស៊ីគ្រប់គ្រងប្រតិបត្តិការទាំងអស់នៅអ៊ុយក្រែនកាលពីដើមខែនេះបាននិយាយថា “សត្រូវបរទេសគឺជាអ្នកបង្កឲ្យមានឧក្រិដ្ឋកម្ម និងជាដើមហេតុឲ្យពលរដ្ឋអ៊ុយក្រែនស្លាប់ ។

លោកឧត្តមសេនីយ៍បានបញ្ជាក់ប្រាប់អ្នក​យក​ព័ត៌មាន​នៅ​តំបន់​ជម្លោះ​កាល​ពី​ថ្ងៃ​អង្គារថា “យើង និងអ៊ុយក្រែនគឺជាប្រជាជនតែមួយ ហើយអ្វីដែលយើងចង់បានដូចគ្នានោះ គឺអ៊ុយក្រែនមានឯករាជ្យពីលោកខាងលិច និងអង្គការណាតូ និងជារដ្ឋមិត្តភាពជាមួយប្រទេសរុស្ស៊ី” ។

ដោយអត្ថាធិប្បាយលើប្រតិបត្តិការវាយលុកលើទីក្រុងកៀវនាពេលថ្មីៗនេះ, លោក Surovikin បានចោទប្រកាន់មេដឹកនាំអង្គការណាតូថា មិនអើពើនឹងការខាតបង់យ៉ាងធ្ងន់ធ្ងរទាំងផ្នែកកម្លាំងពលកម្មក្នុងចំណោមយោធាអ៊ុយក្រែន និងក្នុងចំណោមជនស៊ីវិល” ។

គួរបញ្ជាក់ថា ការលើកឡើងរបស់លោក Surovikin ធ្វើឡើង បន្ទាប់ពីកាលពីពេលថ្មីៗនេះលោកប្រធានាធិបតី វ្ល៉ាឌីមៀរ ពូទីន ក៏បានថ្លែងដែរថា គោលដៅរបស់រុស្ស៊ីគឺមិនមែនអ៊ុយក្រែននោះទេ ពោលរុស្ស៊ីកំពុងធ្វើសង្គ្រាមជាមួយសហរដ្ឋអាមេរិក និងលោកខាងលិច ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ រុស្ស៊ី ប្រាប់ពេលវេលាដែលពិភពលោកនៅតែពឹងផ្អែកលើប្រេងឥន្ធនៈ ធ្យូងថ្ម និងឧស្ម័នធម្មជាតិ