ពលរដ្ឋ អង់គ្លេស ជាង ២៥ ម៉ឺននាក់គាំទ្រញត្តិបោះឆ្នោតបន្ទាន់ ជ្រើសរើស​នាយករដ្ឋមន្ត្រីថ្មី

ពលរដ្ឋអង់គ្លេសរហូតដល់ទៅ ២៥១,០០០ នាក់បានចុះហត្ថលេខាលើញត្តិមួយដែលរៀបចំឡើងដោយសារព័ត៌មាន The Independent អំពាវនាវឲ្យមានការបោះឆ្នោតសកលជាបន្ទាន់ ចាប់តាំងពីការលាលែងពីតំណែងជានាយករដ្ឋមន្ត្រីអង់គ្លេសរបស់លោកស្រី Liz Truss ។

ញត្តិនេះមានន័យថា នាយករដ្ឋមន្ត្រីថ្មីនឹងត្រូវបោះឆ្នោតជ្រើសរើសដោយសមាជិកនៃគណបក្សអភិរក្សដែលនៅតែមានអាសនៈភាគច្រើននៅក្នុងសភា ។

កាលពីថ្ងៃព្រហស្បតិ៍លោកស្រី Liz Truss បានប្រកាសលាលែងពីតំណែង ពោលតិចជាង ២ ខែ បន្ទាប់ពីការតែងតាំងជាប្រធានគណបក្សអភិរក្ស និងជាប្រមុខរដ្ឋាភិបាលចក្រភពអង់គ្លេស ។

ទន្ទឹមនោះលោកស្រី Truss ក៏ក្លាយជានាយករដ្ឋមន្ត្រីដែលកាន់តំណែងខ្លីបំផុតក្នុងប្រវត្តិសាស្ត្រចក្រភពអង់គ្លេស ។ ទោះយ៉ាងណា លោកស្រីនឹងបន្តកាន់តំណែងរហូតដល់អ្នកស្នងតំណែងរបស់លោកស្រីត្រូវបានជ្រើសរើស ។

រដ្ឋាភិបាលរបស់លោកស្រី Truss ត្រូវបានគេរិះគន់យ៉ាងចាស់ដៃចំពោះគោលនយោបាយសេដ្ឋកិច្ចរបស់ខ្លួន ដែលបង្ហាញថា មិនអាចទប់ស្កាត់អតិផរណា និងការដំឡើងថ្លៃ ព្រមទាំងបង្កឲ្យមានការព្រួយបារម្ភអំពីការកើនឡើងនៃបំណុលសាធារណៈជាដើម ៕

ប្រែសម្រួលដោយ ៖ ជិវ័ន្ត

ប្រភព ៖ Sputnik

ចុចអាន ៖ ដំណើររឿង ចាប់តាំងពីការឡើងកាន់អំណាច និងធ្លាក់ពីតំណែង របស់លោកស្រី Liz Truss